Ministri i Jashtëm i Italisë, Antonio Tajani, ka deklaruar se është bërë objektiv i sulmeve kibernetike për shkak të qëndrimit të Italisë në mbështetje të Ukrainës, raportojnë mediat ndërkombëtare.
Në një reagim të publikuar në rrjetet sociale, Tajani bëri të ditur se prej disa ditësh persona të paidentifikuar po shpërndajnë të dhënat e tij personale në rrjetin e errët (Dark Web).
Sipas tij, hakerët po përpiqen të sigurojnë edhe informacione të tjera, duke e ekspozuar ndaj kërcënimeve dhe përpjekjeve për intimidim.
Ai theksoi se sulmet nuk janë kufizuar vetëm tek ai, por kanë përfshirë edhe familjarët e tij.
Kryediplomati italian nënvizoi se mbështetja e Italisë për Ukrainën përbën motivin politik të këtyre sulmeve. Sipas tij, mbrojtja e lirisë, demokracisë dhe pavarësisë së një shteti sovran është kthyer në objektiv të këtyre grupeve kriminale.
Në lidhje me rastin ka reaguar edhe kryeministrja italiane, Giorgia Meloni, e cila shprehu mbështetjen e saj për Tajanin. Ajo deklaroi se publikimi ose shitja e informacioneve konfidenciale që lidhen me zyrtarët publikë është një çështje shqetësuese, e cila duhet të trajtohet me vendosmërinë maksimale.
Ndërkohë, një tjetër sulm kibernetik ka goditur kompaninë BBT SE, përgjegjëse për projektin e tunelit bazë të Brennerit, një lidhje hekurudhore me gjatësi prej 55 kilometrash, e cila do të bashkojë Innsbruckun në Austri me Fortezën në Itali.
Kompania konfirmoi se sulmi ndodhi më 17 tetor, duke bërë të ditur se aktivizoi menjëherë protokollet e sigurisë kibernetike, izoloi sistemet e prekura dhe angazhoi specialistë të jashtëm për të kryer hetimet teknike mbi incidentin.
Sipas raportimeve, nga rrjeti i kompanisë, i cili ishte i lidhur me internetin, janë vjedhur të dhëna jo publike.
Gazeta austriake “Tiroler Tageszeitung”, e cila raportoi e para për sulmin, bëri të ditur se hetimet paraprake kanë orientuar dyshimet drejt një grupi hakerash pro-rusë, të njohur me emrin “Everest”.