Një cigare e lënë ndezur dyshohet se është bërë shkak për zjarrin që përfshiu një banesë në një pallat në lagjen “Skënderbeg” në Lezhë, pasditen e kësaj të shtune.
Sipas njoftimit të Policisë, zjarri ka rënë rreth orës 16:30 në banesën e një shtetasi me inicialet A. L., ndërsa flakët kanë shkaktuar dëme materiale në apartament.
Për shkak të përhapjes së tymit, shërbimet e Policisë dhe Zjarrfikëses kanë evakuuar banorët e pallatit, duke shmangur pasoja të tjera.
Disa prej tyre kanë shfaqur shenja asfiksimi dhe janë transportuar në Spitalin Rajonal të Lezhës, ku po marrin ndihmë mjekësore. Fatmirësisht, ata ndodhen jashtë rrezikut për jetën.
Ndërkohë, personi në banesën e të cilit dyshohet se nisi zjarri është shoqëruar në Komisariatin e Policisë Lezhë për veprime të mëtejshme procedurale.
Grupi hetimor po vijon punën për dokumentimin e plotë të ngjarjes dhe sqarimin e rrethanave të saj.
