Ilse Aigner shihet si një nga kandidaturat me shanse të mira për t’u bërë presidentja e parë grua në historinë e Gjermanisë. Aktualisht në krye të Parlamentit të Bavarisë, 61-vjeçarja ka pas vetes një karrierë të gjatë politike, të ndërtuar përmes përvojës në institucionet federale dhe ato rajonale.
Megjithatë, ndryshe nga shumë figura të tjera që kanë arritur në poste të larta shtetërore, rrugëtimi i saj drejt politikës nuk ka ndjekur modelin tradicional akademik dhe politik, raportojnë mediat gjermane.
E njohur si një politikane e afërt me qytetarët, e përulur dhe pa pretendime të tepruara, Aigner dallohet për komunikimin e drejtpërdrejtë me njerëzit dhe qasjen e saj praktike. Pas këtij imazhi qëndron një karrierë e ndërtuar përmes përvojës, përballjes me krizat dhe angazhimit të vazhdueshëm politik.
Në vitin 2008, ish-kancelarja Angela Merkel e emëroi Ilse Aigner në postin e ministres federale për Mbrojtjen e Konsumatorit, Ushqimin dhe Bujqësinë.
Mandati i saj nisi në një periudhë të vështirë për Gjermaninë, e shoqëruar nga disa kriza ushqimore. Ndër to ishin epidemia EHEC, e lidhur me lakrat e mbira, zbulimi i dioksinës në vezë, si dhe skandali i mishit të kalit, i cili ishte përdorur në produkte të etiketuara si mish viçi.
Përballë këtyre situatave, Aigner ndërmori masa, zhvilloi negociata në nivel evropian dhe organizoi skema kompensimi për fermerët e prekur.
Megjithëse opozita e kritikoi, duke e cilësuar si një ministre që bënte më shumë deklarata sesa ndërmerrte veprime konkrete, ajo arriti të përballonte disa prej krizave më të vështira gjatë mandatit të saj.
Në punën e përditshme, Aigner u dallua edhe për qasjen praktike ndaj problemeve të qytetarëve. Ajo promovoi iniciativa kundër shpërdorimit të ushqimit, duke këshilluar familjet se si të ripërdornin ushqimet e mbetura në shtëpi.
Nga një familje e angazhuar në politikë, drejt karrierës publike
E lindur dhe e rritur në Bavari, Aigner vjen nga një familje ku diskutimet për politikën dhe çështjet shoqërore ishin pjesë e përditshmërisë. Babai i saj ishte mjeshtër elektroteknik dhe anëtar i CSU-së në këshillin bashkiak të Feldkirchen-Westerham.
Në vitin 1990, kur babai i saj u largua nga detyra, Ilse Aigner u zgjodh këshilltare bashkiake, duke shënuar kështu hapin e parë në karrierën e saj politike.
Një nga nismat e para që u vlerësua si e suksesshme ishte krijimi i një autobusi nate, i njohur si “Rosenheimer Nachtexpress”, i cili transportonte të rinjtë nga fshatrat drejt qytetit të Rosenheimit. Ky shërbim vazhdon të funksionojë edhe sot.
Interesi për teknologjinë ishte një tjetër element që e shoqëroi që në fëmijëri. Aigner nuk ndoqi rrugën tradicionale universitare, por u formua profesionalisht në fushën e elektronikës. Më pas punoi në industrinë e helikopterëve, përpara se t’i kushtohej plotësisht politikës.
Në vitin 1994, ajo hyri në Parlamentin e Bavarisë, në të njëjtën kohë me Markus Söderin. Ndërsa Söder konsiderohej një prej figurave të afërta me Edmund Stoiberin, Aigner u pa për një periudhë si pasardhësja e mundshme politike e Horst Seehoferit.
Në vitin 2008, Aigner pasoi Seehoferin në postin e ministres federale të Bujqësisë. Pesë vjet më vonë, në vitin 2013, ajo u rikthye në Bavari, ku Seehofer e emëroi ministre të Ekonomisë dhe zëvendëskryeministre.
Në atë periudhë, Aigner konsiderohej një prej emrave potencialë për të marrë drejtimin e qeverisë bavareze në vitin 2018.
Megjithatë, Markus Söder kishte siguruar tashmë mbështetjen e nevojshme brenda CSU-së dhe arriti të bëhej kryeministër i Bavarisë. Aigner, nga ana e saj, mori drejtimin e Parlamentit të landit, detyrë të cilën vazhdon ta mbajë edhe sot.
Pavarësisht rivalitetit politik, të dy kanë ditur ta trajtojnë publikisht konkurrencën mes tyre edhe me humor, duke u shfaqur në fotografi që ironizonin marrëdhënien e tyre politike.
Respekt përtej partisë, por qëndrim i prerë ndaj AfD-së
Në cilësinë e presidentes së Parlamentit të Bavarisë, Aigner ka fituar respekt edhe përtej radhëve të partisë së saj. Ajo është angazhuar për forcimin e dialogut me qytetarët, bashkëjetesën shoqërore dhe mbrojtjen e institucioneve demokratike.
Megjithatë, ndaj AfD-së ka mbajtur një qëndrim të prerë. Në një rast gjatë një seance në Parlamentin e Bavarisë, ajo i ndërpreu mikrofonin drejtueses së grupit parlamentar të kësaj partie, Katrin Ebner-Steiner, pasi kjo e fundit nuk respektoi rregullat parlamentare.
Aigner është përfshirë gjithashtu në aktivitete përkujtimore dhe humanitare. Një prej momenteve që mediat gjermane veçojnë në profilin e saj publik është vizita në Srebrenicë, ku ajo takoi dhe përqafoi nënat e viktimave të masakrës.
A do të bëhet Ilse Aigner presidentja e parë grua e Gjermanisë?
Kandidatura e Ilse Aigner për postin e presidentes federale ka marrë mbështetjen e drejtuesve të Unionit CDU/CSU, ndërsa emri i saj ka marrë sinjale pozitive edhe nga përfaqësues të forcave të tjera politike.
Zgjedhja e presidentit të ri të Gjermanisë është parashikuar të zhvillohet më 30 janar 2027, përmes Asamblesë Federale.
Nëse arrin të zgjidhet, Ilse Aigner do të hyjë në historinë e Gjermanisë si gruaja e parë që merr postin e Presidentes Federale, duke shënuar një moment të rëndësishëm në historinë politike të vendit.