Kryetari i Partisë Demokratike, Sali Berisha, u bëri thirrje qytetarëve dhe forcave opozitare të bashkohen në mbështetje të protestës së studentëve, pavarësisht kundërshtive dhe dallimeve mes tyre.
Berisha tha se studentët po zhvillojnë atë që ai e cilësoi si një betejë epike kundër Edi Ramës, të cilin e quajti të keqen më të madhe të kombit. Ai garantoi se Partia Demokratike është e vendosur të mbështesë plotësisht studentët dhe revoltën e tyre, si edhe të respektojë të gjithë ata që janë pjesë e kësaj përpjekjeje.
Të lidhura
None found
Duke ftuar çdo qytetar të angazhohet, Berisha deklaroi se bashkimi i të gjithë faktorëve opozitarë duhet të jetë përmbyllja e kësaj lëvizjeje, të cilën e cilësoi të paprecedentë në Shqipëri. Sipas tij, synimi është largimi i qeverisë dhe i atij që ai e quajti «regjimi i narkoshtetit».
Berisha kërkoi më pas krijimin e një qeverie teknike ose kujdestare, e cila të përgatisë kuadrin ligjor dhe kushtet për zgjedhje të lira e të ndershme, në mënyrë që çdo shqiptar të votojë sipas vullnetit të tij për forcën politike dhe kandidatin që dëshiron.
