“Të dyja anët e Parlamentit kërkojnë të flasësh si ata”/ Nga qëndrimet te Bashkia e Tiranës, Braçe në ‘Goca dhe Gra’: Kandidati të zgjidhet nga një garë brenda partisë

Ai u ndal edhe te mundësia për të kandiduar për Bashkinë e Tiranës, duke këmbëngulur se kandidati duhet të përzgjidhet përmes një gare brenda partisë.

Braçe komentoi gjithashtu situatën në kryeqytet dhe pyetjet për Zegjinenë, duke theksuar se kjo e fundit është jashtë fushës së tij profesionale.

“Kjo s’është puna ime. Unë kam një punë tjetër që lidhet drejtpërdrejtë me zonën time elektorale dhe me njerëz që jetojnë atje. Patjetër që si qytetar, e gjitha që po ndodh cenon të përditshmen e njerëzit. I frikëson, i bën të mos dalin nga shtëpia, të vonohen për punë, për shkollë, të vonohen për jetën e tyre të përditshme. Ana tjetër është që ka interesa legjitime atje që duhen bërë pjesë e reflektimit të qeverisë. Domosdo e shumicës parlamentare. Duhet ndarë ajo që është e dhunshme nga ajo që është interes legjitim.

Kjo është zgjedhja ime. Çdo ambient që je, partiak, parlament, publik, detyrimi është të thuash atë që mendon. Njerëzit duhet t’i thuash atë që mendon. Pastaj kush preket nga kjo gjë, mua nuk më intereson.

Ka një problem, sidomos në këtë situatë. E kam pasur shumë problem sepse kryetari i partisë, Kryeministri, Qeveria kërkojnë që të flasësh si ata. Nga ana tjetër, edhe pjesa tjetër e asaj salle do të flasësh si ata. Unë mund të kem një mendim që s’është as si këta, as si ata. Në çdo moment të vënë përballë fakteve qe ti të ikësh. Por ti do të rrish. E rëndësishme është të qëndrosh. Do të të shtyjnë, do të të bien me bërryla, do mbetesh dhe pa frymë, por duhet të qëndrosh se të kanë votuar.

Unë kam kërkuar që të bëhet një garë brenda asaj partisë time dhe kandidati i partisë time të zgjidhet nëpërmjet garës. Unë kam kërkuar një garë dhe do i qëndroj deri në fund kësaj historie.

Çfarë do ndryshoja nga Tirana? Pastërtinë. Është shumë e papastër. Tirana është e pisët sot që flasim.

Zegjineja? Në botë ka dy lloje burrash. Burra që flasin me gratë dhe burrat që flasin për gratë. Unë për gratë nuk flas. Unë jam ekonomist. Zonja Arta Dade ka qenë pedagoge. Ndërkohë zonjusha që ju po më pyesni është juriste, larg profesionit tim. E ka vitin e parë në mandatin e parë në Parlament. Edhe unë kështu kam qenë në mandatin tim të parë”, tha ndër të tjera Braçe.

Top Channel