Goditje për Netanyahun/ Presidenti i Izraelit ia beson rivalit të tij, Gadi Eisenkot formimin e qeverisë së re

Presidenti i Izraelit, Isaac Herzog, ka vendosur t’ia japë kandidatit të opozitës, Gadi Eisenkot, mundësinë e parë për formimin e qeverisë së re, pas zgjedhjeve parlamentare të 27 tetorit.

Vendimi përbën një goditje politike për kryeministrin Benjamin Netanyahu, i cili synon të vazhdojë qëndrimin në pushtet.

Sipas agjencisë amerikane të lajmeve Associated Press, Herzog e bëri të ditur vendimin të shtunën në mbrëmje, pas konsultimeve disaditore me përfaqësuesit e partive politike.

Eisenkot, ish-shef i ushtrisë izraelite, ishte rivali kryesor i Netanyahut në zgjedhje, duke udhëhequr një bllok partish që synojnë largimin nga pushteti të kryeministrit më jetëgjatë në historinë e Izraelit.

Megjithatë, as Eisenkot dhe as Netanyahu nuk arritën të siguronin shumicë të qartë në zgjedhjet e 27 tetorit.

Gjatë konsultimeve intensive të zhvilluara këtë javë me presidentin Herzog, përfaqësuesit e shumicës së partive kryesore izraelite rekomanduan që Eisenkot të ngarkohej me formimin e qeverisë së ardhshme.

Njoftimi i presidentit, i cili pritej të bëhej të dielën, erdhi pak pasi Netanyahu publikoi një videomesazh, përmes të cilit bëri thirrje për formimin e një qeverie të unitetit kombëtar.

Në deklaratën e tij, Netanyahu paralajmëroi kundër asaj që e cilësoi si përpjekje për të formuar me nxitim një qeveri me mbështetjen e partive arabe.

Ai kërkoi krijimin e një “qeverie të unitetit kombëtar”, ndërsa paralajmëroi kundër “betimit me nxitim të një qeverie me mbështetës të terroristëve”, sipas deklaratës së cituar nga AP.

Deklarata e tij ishte një referencë e dukshme ndaj partive të udhëhequra nga arabët, të cilat Netanyahu dhe aleatët e tij i kanë paraqitur vazhdimisht si kërcënim për sigurinë kombëtare.

Në anën tjetër, Eisenkot ka sinjalizuar gatishmëri për të bashkëpunuar me këto parti, por vetëm në kushte të caktuara.

Një ndër kushtet e përmendura është qëndrimi se Hamasi është organizatë terroriste që duhet të shkatërrohet.

Partia e Eisenkotit, Yashar, reagoi ashpër ndaj videomesazhit të Netanyahut përmes një deklarate të publikuar në platformën X.

Në reagimin e saj, kjo parti u bëri thirrje anëtarëve të Likudit, partisë së Netanyahut, që të distancohen nga aleanca me “partitë radikale”, duke iu referuar, me sa duket, partive më ekstreme të bllokut të tij fetaro-nacionalist.

Yashar theksoi gjithashtu se Eisenkot do të përfshijë në qeverinë e tij vetëm ato parti dhe deputetë që mbështesin parimet e përcaktuara prej saj.

Ndër këto parime përfshihet edhe njohja e Hamasit si organizatë terroriste.

Vendimi i presidentit Herzog i jep Eisenkotit përparësinë në përpjekjet për krijimin e koalicionit qeverisës, ndërsa mungesa e një shumice të qartë parlamentare e bën mbështetjen e partive të tjera vendimtare për formimin e qeverisë së re.