Asociacioni i Komunave të Kosovës (AKK) kundërshton vlerësimin e projektbuxhetit për vitin 2027 si rekord për pushtetin lokal. Drejtori ekzekutiv i asociacionit, Sazan Ibrahimi, thotë se ndonëse shuma e parashikuar për komunat arrin në 908 milionë euro, pesha e tyre në buxhetin e përgjithshëm të shtetit është zvogëluar.
Sipas Ibrahimit, komunat përfituan 21.7 për qind të buxhetit të vitit 2026, ndërsa planifikimi për vitin e ardhshëm e ul këtë pjesëmarrje në 21.3 për qind. Ai i tha KosovaPress-it se vlerësimi i buxhetit duhet të mbështetet edhe te mundësia konkrete për zbatimin e investimeve dhe projekteve kapitale, jo vetëm te vlera e përgjithshme monetare.
Të lidhura
None found
Ai paralajmëroi gjithashtu se rritja e parashikuar e koeficientit të pagave do të ndikojë në financat komunale. Sipas tij, në planifikim nuk është reflektuar inflacioni i viteve të fundit, i cili, bazuar në statistikat e këtij viti, gjatë disa muajve ka qenë rreth 7 për qind.
Ulja prej 0.4 pikësh përqindjeje në pjesën e komunave, sipas Ibrahimit, nënkupton humbje prej dhjetëra miliona eurosh. Ai i ka bërë thirrje Kuvendit të Kosovës që gjatë shqyrtimit të projektbuxhetit të marrë parasysh kërkesat financiare të pushtetit lokal, pasi ndarja e propozuar nuk mjafton për të mbështetur zhvillim të qëndrueshëm ekonomik.
Ibrahimi ka vënë në dukje edhe ndikimin e vendimeve gjyqësore, kryesisht atyre që lidhen me kontratat kolektive. Vetëm këtë vit, komunave u janë marrë rreth 100 milionë euro për zbatimin e këtyre vendimeve, ndërsa AKK kërkon që shpenzimi të mbulohet nga niveli qendror dhe jo të mbetet barrë e komunave.
Ai tha se pagesat kanë ndikuar në strukturën buxhetore të komunave dhe kanë kufizuar investimet kapitale. Sipas tij, ato ua vështirësojnë edhe aplikimin për financime shtesë nga granti i performancës, duke krijuar pasoja zinxhir që kushtojnë qindra miliona euro.
Asociacioni i ka kërkuar kryeministrit Albin Kurti takim me bordin e AKK-së për të diskutuar këto çështje, por ende nuk ka marrë përgjigje. Ibrahimi bëri të ditur se takimi i fundit me Kurtin u zhvillua në tetor të vitit 2024.
Ndër shqetësimet e tjera që ai ngriti janë dëmet nga vërshimet, të cilat ende nuk janë kompensuar në disa komuna që nga viti 2022, si dhe humbja e fondeve të Bashkimit Evropian.
Qeveria e Kosovës e miratoi më 2 nëntor projektbuxhetin për vitin 2027, me vlerë 4.27 miliardë euro. Nga kjo shumë, 908 milionë euro janë planifikuar për komunat, ndërsa kryeministri Albin Kurti e ka cilësuar atë buxhet rekord për pushtetin lokal.
