Një incident i pazakontë raportohet të ketë ndodhur në ambientet e brendshme të stadiumit, ku dy futbollistët e Real Madridit, Jude Bellingham dhe Antonio Rüdiger, janë përfshirë në një përplasje të dyshuar me pjesëtarë të stafit të sigurisë.
Sipas raportimeve, situata është tensionuar në tunelin e stadiumit, ku mesfushori anglez Bellingham pretendohet se ka goditur një punonjës sigurie. Ndërkohë, mbrojtësi gjerman Rüdiger akuzohet se ka qëlluar me shuplakë një tjetër pjesëtar të personelit.
Të dy episodet dyshohet se janë raportuar menjëherë tek arbitri i takimit nga vetë punonjësit e sigurisë, të cilët kanë kërkuar dokumentimin e incidenteve.
Gjyqtari mësohet se ka marrë shënim pretendimet e paraqitura, ndërsa pritet të shihet nëse ato do të pasqyrohen në raportin zyrtar të ndeshjes.
Nëse akuzat konfirmohen dhe organet kompetente disiplinore konstatojnë shkelje të rregulloreve, dy futbollistët e Real Madridit mund të përballen me masa ndëshkuese.
Megjithatë, deri në këtë fazë, nuk ka një konfirmim zyrtar që të vërtetojë se Bellingham dhe Rüdiger kanë ushtruar dhunë fizike ndaj punonjësve të sigurisë.
Ngjarja mbetet në nivelin e pretendimeve të raportuara, ndërsa një vendim i mundshëm i autoriteteve sportive pritet të sqarojë rrethanat dhe përgjegjësitë e secilit prej futbollistëve.
Nëse incidentet vërtetohen, ato mund të krijojnë një tjetër situatë problematike për klubin madrilen, këtë herë jashtë fushës së lojës.