Partia Demokratike e Kosovës po përballet me procesin e riorganizimit të brendshëm, pas largimit të Bedri Hamzës nga drejtimi i partisë dhe hapjes së garës për zgjedhjen e kryetarit të ri. Në këtë proces, përveç emrave që po përmenden si kandidatë potencialë, sipas analistëve politike vëmendje duhet të ketë edhe modeli i udhëheqjes që do të ndjekë PDK-ja në të ardhmen. Analisti politik, Blerim Canaj, thotë për Kosovapress se ende nuk është e qartë nëse PDK-ja synon të ndërtojë një parti të mirëfilltë politike apo një subjekt ku vendimmarrja ndikohet nga interesat e grupeve të caktuara. “Unë nuk do të dëshiroja që PDK-ja të kopjojë Lidhjen Demokratike të Kosovës dhe pastaj ato grupet e interesit brenda partisë të çojnë në shkatërrimin edhe të një partie shtetformuese. Momentalisht, në periudhën që po flasim ne, duket sikur situata është e tillë dhe ka grupe të interesit. Sidoqoftë, ende nuk është e qartë se çfarë po tenton PDK-ja të bëjë. A do t’ia ofrojë Kosovës një parti të mirëfilltë politike? A do t’ia ofrojë Kosovës një shoqatë të gastronomëve apo do t’ia ofrojë Kosovës një parti të grupeve të interesit? Nga lideri të cilin do ta zgjedhë PDK-ja do të varet shumë edhe drejtimi i saj. Çka i duhet Kosovës? Kosovës i duhet një lider që e sheh partinë e tij si parti politike. Pastaj partia ia ofron kandidatin më të mirë të mundshëm shtetit të Kosovës për kryeministër. Momentalisht, përshtypja ime është se disa persona brenda PDK-së nuk e duan një parti e cila thjesht del dhe fiton zgjedhjet dhe që i bën konkurrencë Albin Kurtit. Mirëpo, thjesht e duan një parti për vete aty. Momentalisht, gjithmonë po flas për çështje të interesave të disa personave. Unë në garë do të dëshiroja brenda PDK-së t’i shihja dikë si Enver Hoxhaj dhe Hajredin Kuçi”, tha ai. Edhe për Arbnor Sadikun, drejtimi i ardhshëm i PDK-së do të përcaktohet nga modeli organizativ dhe politik që do të zgjedhë partia.