Gjiganti amerikan i teknologjisë Nvidia ka nisur një hetim të pavarur ndaj themeluesit dhe drejtorit ekzekutiv, Jensen Huang, pas raportimeve se ai mund të ketë qenë objektiv i një operacioni të inteligjencës kineze. Skandali ka ngritur shqetësime për sigurinë kombëtare të SHBA-së dhe mbrojtjen e sekreteve teknologjike të kompanisë.

Bordi drejtues i Nvidia-s njoftoi se ka vendosur të nisë një hetim të pavarur, pas publikimeve të gazetës amerikane The New York Times, sipas të cilave Huang kishte krijuar një marrëdhënie të ngushtë me biznesmenen kineze Alice Huang, e dyshuar nga autoritetet amerikane të inteligjencës si bashkëpunëtore e Pekinit.

Sipas raportimeve, Alice Huang, e njohur gjithashtu si Huang Le, dyshohet se ishte rekrutuar nga shërbimet kineze të inteligjencës për të mbledhur informacione rreth drejtuesit të Nvidia-s dhe planeve të kompanisë në industrinë e gjysmëpërçuesve dhe inteligjencës artificiale. Ajo ka punuar si drejtuese në kompaninë Megaspeed, me seli në Singapor, e cila është një nga klientët e rëndësishëm të Nvidia-s në rajonin e Azisë Juglindore.

Sipas raportimeve mediatike, autoritetet amerikane kishin ngritur shqetësime se kjo kompani mund të kishte ndihmuar në sigurimin e pajisjeve të avancuara të inteligjencës artificiale për subjekte kineze, duke anashkaluar kufizimet amerikane të eksportit. Në një deklaratë zyrtare, Nvidia bëri të ditur se hetimi do të drejtohet nga një komitet i përbërë nga anëtarë të pavarur të bordit, me ndihmën e këshilltarëve ligjorë të jashtëm.

Kompania theksoi se, deri më tani, nuk ka arsye të besojë se janë komprometuar sekretet e saj tregtare apo siguria kombëtare e Shteteve të Bashkuara. Megjithatë, bordi ka vendosur të shqyrtojë të gjitha informacionet e disponueshme për të përcaktuar nëse ka pasur ndonjë ekspozim ndaj përpjekjeve të mundshme të spiunazhit të huaj.

Nvidia konfirmoi gjithashtu se Jensen Huang e mbështet plotësisht hetimin dhe ka premtuar të bashkëpunojë me autoritetet dhe drejtuesit e pavarur që do të merren me këtë çështje. Përveç shqetësimeve për sigurinë kombëtare, çështja ka marrë edhe një dimension personal, pasi Jensen Huang ka pranuar se ka qenë i pabesë ndaj bashkëshortes së tij. Në një mesazh drejtuar punonjësve të kompanisë, ai ka kërkuar falje për veprimet e tij dhe për dhimbjen që u ka shkaktuar familjarëve.

“Veprimet e mia e kanë lënduar bashkëshorten dhe fëmijët e mi. Nuk ka asnjë justifikim për atë që kam bërë. Më vjen jashtëzakonisht keq”, është shprehur Huang.

/rtsh.al/