Presidenti amerikan Donald Trump deklaroi se nuk e kundërshton vlerësimin e zëvendëspresidentit JD Vance, sipas të cilit humbjet e republikanëve në zgjedhjet e mesmandatit u ndikuan nga lufta me Iranin.
“Nuk e kundërshtoj këtë vlerësim”, tha Trump gjatë një interviste për emisionin 60 Minutes të CBS-së.
I pyetur nëse kishte qenë në dijeni të postimit që zëvendëspresidenti do të publikonte në rrjetin social X, Trump tha se Vance e kishte informuar paraprakisht dhe se kishte qenë i hapur me të lidhur me përmbajtjen e tij.
“Ai më pyeti se çfarë mendoja. I thashë: Shkruaj çfarë të duash. Meqë ra fjala, çfarë do të shkruash?”, tregoi presidenti.
Sipas Fox News, Trump tha se e vetmja gjë që do të dëshironte të kishte përfshirë Vance në analizën e tij ishte nëse do të kishte mbështetur sërish sulmin ndaj Iranit, duke pasur parasysh rolin e tij në procesin e vendimmarrjes së administratës.
“Përgjigjja ime është një po e prerë, sepse nuk mund të lejojmë që Irani të ketë armë bërthamore”, deklaroi Trump.
Ai mbrojti vendimin e administratës për përfshirjen në luftë, duke argumentuar se parandalimi i pajisjes së Iranit me armë bërthamore ishte më i rëndësishëm se pasojat politike për republikanët. Sipas tij, edhe nëse ky vendim është jopopullor në afat të shkurtër, ai mund të vlerësohet pozitivisht në perspektivë historike.
“Mendoj se historikisht ky do të jetë një vendim shumë i mirë. A është vendim i mirë për sot dhe nesër? Ndoshta jo”, tha presidenti, duke shtuar se do të ishte kritikuar shumë më ashpër nëse Irani do të kishte siguruar armë bërthamore gjatë mandatit të tij.
Të mërkurën, Vance kishte publikuar një reagim për rezultatin e zgjedhjeve, duke e cilësuar luftën me Iranin si arsyen kryesore të humbjes së republikanëve.
“Arsyeja e vërtetë pse humbëm është e qartë për pothuajse të gjithë. Arsyeja pse humbëm është lufta”, shkroi ai në X.
Demokratët arritën të rimarrin kontrollin e të dyja dhomave të Kongresit, duke fituar të paktën shtatë vende në Senat dhe më shumë se dy duzina distrikte në Dhomën e Përfaqësuesve. Vance, ashtu si Trump, argumentoi se kostoja politike e luftës ishte një çmim që ia vlente të paguhej.
