Nvidia heton CEO-n, Jensen Huang! Dyshime për një aferë me një spiune kineze

Gjigandi amerikan i teknologjisë Nvidia po hap një hetim ndaj drejtorit të saj ekzekutiv, Jensen Huang, pas raportimeve se ai ishte “objektiv i një përpjekjeje të inteligjencës së huaj”, njoftoi të dielën bordi i drejtorëve të kompanisë.

Një raport nga The New York Times tha se CEO i kishte pranuar bordit se kishte qenë “i pabesë” me kompaninë me një person që po mblidhte informacione për Kinën.

Në një letër drejtuar punonjësve të Nvidia-s, Huang tha se merrte “përgjegjësi të plotë” për veprimet e tij, ndërsa pranoi se nuk ishte besnik ndaj gruas së tij dhe u kërkoi falje familjes dhe kolegëve të tij. Megjithatë, ai nuk përmendi emrin e personit të përfshirë apo lidhjet e saj të raportuara me Pekinin.

 “Të drejtoj Nvidia është privilegji i jetës sime”, shkroi 63-vjeçari.

“Përgjegjësia ime është t’ju shërbej dhe të jem i denjë për besimin tuaj. Nuk e kam përmbushur këtë përgjegjësi”, shtoi ai.

Bordi që drejton kompaninë, e cila është një nga më të vlefshmet në botë, thotë se nuk ka arsye të besojë se siguria kombëtare ose sekretet e Nvidia-s janë kompromentuar, por se do të kryhet një hetim i plotë. Bordi shtoi se Huang e mbështet plotësisht shqyrtimin dhe është zotuar të bashkëpunojë me të.

Në letrën e tij drejtuar punonjësve, Jensen Huang tha: “E dua vendin dhe kompaninë tonë. Jam i përkushtuar për të mbrojtur Nvidia-n dhe për të mbështetur sigurinë kombëtare të Amerikës.”

Muajin e kaluar, gazeta The New York Times raportoi se agjencitë e inteligjencës amerikane kishin zbuluar se Huang kishte zhvilluar lidhje të ngushta me një kinez dhe blerësen e çipave, Alice Huang, dhe se ajo po ndante informacione drejtpërdrejt me Pekinin.

Alice Huang është një drejtuese e lartë në Megaspeed, një kompani që drejton një qendër të dhënash me seli në Singapor dhe është bërë një nga klientët më të mëdhenj të Nvidia në Azinë Juglindore.