Policia e Tiranës ka arrestuar 50 vjeçarin Robert Dukën nga Vlora, i dyshuar si autor i grabitjes së një banke të nivelit të dytë në zonën e Komunës së Parisit në kryeqytet.

Ngjarja ndodhi më 2 nëntor 2026, rreth orës 10:45, kur një person i maskuar hyri në ambientet e bankës dhe, nën kërcënimin e një sendi që ngjante me armë, arriti të marrë një shumë parash.

Sipas të dhënave paraprake, autori kërcënoi fillimisht punonjësin e sigurisë dhe më pas iu drejtua sporteleve, ku mori paratë. Pas grabitjes, ai u largua nga vendngjarja me një monopatinë elektrike, në drejtim të stadiumit “Selman Stërmasi”.

Pas hetimeve dhe veprimeve policore, Robert Duka u lokalizua dhe u arrestua pranë rrugës së Kosovarëve në Tiranë. 50-vjeçari dyshohet gjithashtu se është autor i një tjetër grabitjeje bankare, të ndodhur disa muaj më parë, po në zonën e Komunës së Parisit.

Policia bën me dije se hetimet vijojnë për dokumentimin e plotë të të dyja ngjarjeve dhe për sqarimin e rrethanave të tyre.

/rtsh.al/