Aktori amerikan Bug Hall, i njohur për rolin e Alfalfa-s në filmin e famshëm “The Little Rascals”, ka bërë një apel publik për ndihmë financiare, ndërsa ai dhe bashkëshortja e tij, Jill, presin të bëhen prindër për herë të gjashtë. 41-vjeçari ka hapur një fushatë në GoFundMe, duke shpjeguar se familja e tij po kalon një periudhë të vështirë ekonomike dhe ka nevojë për mbështetje përpara lindjes së foshnjës, e cila pritet të vijë në jetë brenda më pak se një muaji.
“Kanë kaluar gjashtë vite që kur vendosa të tërhiqesha vetë nga kjo botë. Gjatë gjithë kësaj kohe kam shmangur të bëja një kërkesë të tillë. Gjithmonë kam thënë se ishte zgjedhja ime dhe nuk doja t’ua kaloja të tjerëve këtë barrë, përveç rastit kur nuk do të kishte më asnjë zgjidhje. Epo, ja ku jemi”, shkroi aktori në faqen e mbledhjes së fondeve më 5 nëntor. Hall tregoi se ai, bashkëshortja dhe pesë fëmijët e tyre jetojnë në një furgon kampingu në Mountain View, Arkansas. Familja është zhvendosur së fundmi në një pronë të re, por ende nuk ka arritur të përfundojë të gjitha punimet dhe instalimet e nevojshme për të krijuar kushtet e duhura të jetesës.
Aktori pranoi se ka mbetur pas me disa pagesa, përfshirë faturën e telefonit, gazin për automjetin dhe një tarifë të papritur për lidhjen me energjinë elektrike. Pavarësisht vështirësive, ai theksoi se familja është e lumtur me jetën e re që ka zgjedhur, edhe pse kushtet nuk janë aspak të lehta. “Foshnja e gjashtë pritet të vijë në jetë pas më pak se një muaji dhe kam vërtet nevojë për ndihmë që të përfundoj gjërat e fundit përpara lindjes”, shtoi ai, duke shpresuar që gjithçka të jetë gati brenda dy javësh, në mënyrë që më pas të mund të marrë përsipër disa punë.
Hall u bëri thirrje njerëzve që ta mbështesin në çdo mënyrë të mundshme, jo vetëm përmes kontributeve financiare, por edhe duke shpërndarë fushatën apo duke u lutur për familjen e tij. Kjo kërkesë vjen rreth një vit pasi aktori foli publikisht për vendimin e tij për të hequr dorë nga të ardhurat dhe për të jetuar sipas një modeli që ai vetë e ka përshkruar si “betim varfërie”.
Në një intervistë për “Daily Mail”, të publikuar më 28 janar, Hall shpjegoi se synonte të jetonte me sa më pak nevojë për të ardhura, duke pranuar punë të rastësishme vetëm kur familja kishte nevojë për para. Ai ishte tërhequr nga aktrimi në vitin 2020, pas arrestimit për përdorim të një substance që gjendet në bombolat e ajrit të kompresuar. Sipas deklaratave të tij për mediat, ndaj tij nuk u ngritën akuza.
