Një zjarr i fuqishëm që përfshiu një ndërtesë shumëkatëshe në qytetin Taiyuan, në veri të Kinës, ka shkaktuar të paktën 14 viktima dhe dhjetëra të lënduar.
Sipas raportimeve të Ruters, zjarri shpërtheu të dielën pasdite në një kompleks banimi dhe biznesi, ndërsa flakët u përhapën me shpejtësi në disa kate të ndërtesës.
Si pasojë e incidentit, 38 persona u dërguan në spital për trajtim mjekësor. Sipas informacioneve të publikuara, 25 prej tyre vazhdonin të merrnin trajtim edhe të hënën, ndërsa nëntë persona ndodheshin në gjendje të rëndë.
Ekipet e zjarrfikësve dhe të emergjencës ndërhynë në vendngjarje, duke arritur ta vënë zjarrin nën kontroll pas rreth dy orësh. Operacionet e shpëtimit përfunduan gjatë mbrëmjes së së dielës.
Shkaqet e zjarrit ende nuk janë bërë të ditura, ndërsa autoritetet kineze kanë nisur hetimet për zbardhjen e plotë të rrethanave të kësaj tragjedie.