Një lidhje jashtëmartesore e kreut të një prej kompanive më të fuqishme të teknologjisë në botë është kthyer në çështje të sigurisë kombëtare amerikane. Jensen Huang, drejtori ekzekutiv dhe bashkëthemeluesi i Nvidia-s, ka pranuar publikisht marrëdhënien me Alice Huang, një biznesmene kineze që, sipas shërbimeve amerikane të inteligjencës, dyshohet se përcillte informacione sekrete drejt Pekinit. Sipas gazetës New York Times, gruaja, e njohur edhe si Huang Le, kishte lidhje me kompaninë Megaspeed, me seli në Singapor, e cila është vënë nën hetim për dyshime se ka ndihmuar në dërgimin e çipave amerikanë të inteligjencës artificiale drejt Kinës. Në një mesazh drejtuar punonjësve, 63-vjeçari Jensen Huang pranoi tradhtinë bashkëshortore, duke kërkuar falje për dëmin që i kishte shkaktuar familjes. Bordi drejtues i Nvidia-s njoftoi nisjen e një hetimi të pavarur për të përcaktuar nëse gjatë kësaj marrëdhënieje janë komprometuar informacione konfidenciale të kompanisë apo të sigurisë kombëtare. Çështja bëhet edhe më delikate për shkak të marrëdhënieve të afërta të Huang me presidentin amerikan Donald Trump, të cilin ai e këshillon jozyrtarisht për zhvillimet në industrinë e inteligjencës artificiale. Sipas raportimeve, autoritetet amerikane dyshojnë se biznesmenja kineze mund të ketë siguruar informacione mbi qëndrimet e administratës Trump në garën teknologjike me Kinën. Presidenti amerikan deklaroi se kishte besim te drejtuesi i Nvidia-s, ndërsa pranoi se ishte informuar për dyshimet e inteligjencës rreth një vit më parë. Pekini i ka hedhur poshtë kategorikisht akuzat, duke i cilësuar pretendimet për spiunazh si shpifje të pabaza. Skandali ka goditur edhe tregjet financiare. Aksionet e Nvidia-s ranë me rreth 5 për qind në platformën gjermane Tradegate, përpara hapjes së bursës amerikane.