Policia e Kosovës ka arrestuar në Prizren një person ndaj të cilit ishte lëshuar urdhërarrest aktiv nga Gjykata Themelore në Prishtinë. Ai ishte i dënuar me pesë vjet burgim efektiv për vepra penale që lidhen me narkotikët.
Sipas njoftimit të Policisë, arrestimi është bërë të hënën, rreth orës 11:00, pasi zyrtarët policorë kishin marrë informacione për vendndodhjen e personit të kërkuar.
Pas lokalizimit dhe ndalimit të automjetit me të cilin po udhëtonte, policia ka kontrolluar tre personat që ndodheshin brenda tij.
Gjatë kontrollit, te njëri prej personave është gjetur dhe sekuestruar rreth shtatë gramë substancë e dyshuar si kokainë.
I dyshuari për posedimin e substancës narkotike, së bashku me provat materiale, i është dorëzuar Njësisë për Hetimin e Trafikimit me Narkotikë në Prizren për procedura të mëtejshme, ndërsa personi i tretë është liruar pas verifikimeve.
Policia ka bërë të ditur se në kuadër të Drejtorisë Rajonale në Prizren është formuar edhe një grup i veçantë operacional, i cili merret me identifikimin dhe arrestimin e personave ndaj të cilëve janë lëshuar urdhërarreste aktive.