Alice Huang, gruaja e përfshirë në skandalin e dyshimeve për spiunazh në favor të Kinës, kishte prezantuar para investitorëve kinezë një projekt të madh për ndërtimin e qendrave të të dhënave në Azinë Juglindore, duke pretenduar se kishte akses në procesorët grafikë (GPU) të Nvidia-s dhe marrëdhënie tregtare me gjigantin teknologjik Alibaba.
Sipas dy investitorëve që u njohën me propozimin, në fillim të vitit 2025, Huang dhe partneri i saj i biznesit, Kang Wei, kërkuan financim për një projekt të qendrës së të dhënave me vlerë disa qindra milionë dollarë, përcjell FT.
Gjatë prezantimit, ata deklaruan se nuk kishin probleme për të siguruar procesorët GPU të Nvidia-s, ndërsa përmendën Alibaba-n si një prej klientëve të projektit.
Sipas rregullave aktuale amerikane për eksportin e teknologjisë, kompanitë kineze mund të marrin me qira kapacitete të qendrave të të dhënave jashtë Kinës. Megjithatë, ato nuk lejohen të zotërojnë drejtpërdrejt këto asete, ku përfshihen edhe procesorët e avancuar të Nvidia-s.
Gjatë prezantimit të marrëveshjes dhe kontakteve të saj të biznesit, Alice Huang nuk kishte bërë të ditur ndonjë marrëdhënie të afërt me drejtuesin ekzekutiv të Nvidia-s, Jensen Huang.
Emri i saj doli në qendër të vëmendjes pasi u raportua se autoritetet amerikane dyshonin se drejtuesi i kompanisë kishte pasur një lidhje romantike me një grua kineze, e cila dyshohet se ishte rekrutuar nga Ministria e Sigurisë së Shtetit të Kinës për spiunazh.
Sipas një memorandumi të hartuar këtë vit nga zyrtarë amerikanë, bazuar në informacione të inteligjencës, Jensen Huang dyshohet se kishte pasur një marrëdhënie romantike me Alice Huang, e cila kishte punuar si drejtuese në Megaspeed, një kompani me seli në Singapor dhe kliente e Nvidia-s. Megjithatë, pretendimet për spiunazh nuk janë verifikuar në mënyrë të pavarur nga Financial Times.
Alice Huang, e njohur edhe me emrin kinez Huang Le, është gjithashtu partnere në fondin e investimeve Hexi Private Equity Partners, të themeluar në vitin 2010.
Sipas dokumenteve të regjistrimit të kompanive në Kinë, fondi nuk ka përditësuar rezultatet vjetore që prej vitit 2022 dhe një pjesë e produkteve të tij të investimit janë mbyllur. Në vitin 2023, ajo u regjistrua për një periudhë të shkurtër si drejtuese në Megaspeed, kompani që po hetohet në disa juridiksione për dyshime mbi kontrabandën e çipave. Megaspeed i ka mohuar me forcë akuzat për aktivitet të paligjshëm.
Ndërkohë, Jensen Huang pranoi të dielën se kishte pasur një lidhje jashtëmartesore, dy ditë pasi Financial Times publikoi raportimin për marrëdhënien e tij të pretenduar me Alice Huang.
Pas publikimit të lajmit, aksionet e Nvidia-s ranë me 7% në orët e para të tregtimit të së hënës, pasi bordi drejtues i kompanisë njoftoi hapjen e një hetimi për raportimet.
Ministria e Jashtme e Kinës i ka hedhur poshtë pretendimet për spiunazh, duke i cilësuar ato si të pabaza dhe si një fushatë shpifjesh. Ndërkohë, Kang Wei, partneri i biznesit i Alice Huang, rezulton sipas dokumenteve të korporatave të jetë edhe anëtar i bordit të Guilin Bank, një bankë e kontrolluar nga shteti.
Ai nuk iu përgjigj kërkesave të medias për koment, ndërsa Alice Huang nuk u bë e arritshme përmes telefonit dhe llogaritë e saj në WeChat dhe email duket se janë fshirë.
Raportimi i Financial Times zbulon gjithashtu lidhjet tregtare mes Megaspeed dhe Alibaba-s. Dokumentet e kompanisë tregojnë se në qershor 2024, Alibaba, përmes filialit të saj në Singapor, Apex Enterprise Solutions, i dha hua para Megaspeed-it përmes filialit malajzian Speedmatrix. Si garanci për kredinë, Speedmatrix vendosi të gjithë aktivitetin e saj tregtar.
Gjatë vitit 2024, bilanci financiar i Megaspeed u rrit nga 33 milionë në 3 miliardë dollarë, një pjesë e konsiderueshme e të cilit lidhej me aktivitetin e filialeve të saj.
Sipas dy personave të njohur me çështjen, Alibaba ishte klienti kryesor i shërbimit cloud të Megaspeed në Azinë Juglindore që prej fillimit dhe vijon të jetë klienti më i madh i kompanisë. Njëri prej tyre tha se Nvidia kishte nisur kontaktet me Megaspeed për furnizimin me çipa pasi kjo e fundit kishte paraqitur kontratën e qirasë së kapaciteteve me Alibaba-n.
Deri në publikimin e raportimit, Alibaba nuk kishte dhënë një përgjigje për kërkesën e medias për koment.
Ndërsa fotografitë e Jensen Huang dhe Alice Huang së bashku në Shangai, Hong Kong dhe Kaliforni nuk provojnë në vetvete natyrën e marrëdhënies mes tyre; disa prej tyre janë realizuar në ambiente me pjesëmarrës të tjerë.
