Mbi 400,000 rusë të vdekur në luftën e Ukrainës, dalin në dritë të dhëna të reja

Më shumë se 400,000 rusë kanë humbur jetën në luftën e Ukrainës që nga fillimi i  pushtimit të Moskës në shkurt 2022, sipas të dhënave që dyshohet se janë publikuar nga agjencia shtetërore ruse e statistikave Rosstat.

Të dhënat, të marra nga grupi i hakerëve Cyber ​​​​Partisans , i lidhur me opozitën bjelloruse, dhe grupi ukrainas Silent Crow , përfshijnë më shumë se 11 milionë certifikata vdekjeje, me informacione mbi moshën, vendbanimin dhe vendin e vdekjes së të ndjerit.

Sipas gazetës Guardian, së cilës iu dhanë të dhënat, 412,576 certifikata vdekjeje lidhen me luftën, qoftë përmes shkaqeve zyrtare të vdekjes ose përmes raporteve me shkrim mbi betejat dhe operacionet ushtarake.

Shifrat pasqyrojnë koston e madhe njerëzore të luftës, e cila po i afrohet pesë viteve dhe nuk duket se do të mbarojë, pavarësisht bisedimeve të reja për paqe të planifikuara për këtë javë në Abu Dhabi.

Dy grupet e hakerëve njoftuan shkeljen e sistemeve të Rosstat më 1 nëntor dhe publikuan të dhënat gjatë fundjavës.

Agjencia ruse e statistikave konfirmoi se ishte nënshtruar një sulmi kibernetik, por mohoi se kishte rrjedhur informacion i ndjeshëm.

The Guardian vëren se nuk ka qenë në gjendje të verifikojë në mënyrë të pavarur vërtetësinë e të dhënave, por numrat janë përgjithësisht në përputhje me vlerësimet e tjera të viktimave ruse.