Një shpërthim i fuqishëm në një fabrikë hekuri dhe çeliku në Turqinë perëndimore ka shkaktuar një tragjedi, duke lënë 10 punëtorë të vdekur dhe 15 të plagosur.

Ngjarja e rëndë ndodhi të hënën në uzinën “Habas Demir Çelik”, pranë qytetit të Izmirit. Sipas autoriteteve, katër prej të plagosurve ndodhen në gjendje kritike, ndërsa ekipet e shpëtimit vijojnë kërkimet për persona që mund të kenë mbetur të bllokuar nën rrënoja.

Shpërthimi shkaktoi flakë të fuqishme dhe një re të madhe tymi të zi, që u përhap në një pjesë të impiantit industrial. Dëshmitarët kanë treguar se fuqia e goditjes ishte aq e madhe sa fillimisht menduan se bëhej fjalë për një tërmet.

“U duk sikur toka po lëvizte poshtë këmbëve tona”, rrëfeu një dëshmitar, duke përshkruar momentet e panikut pas shpërthimit.

Sipas të dhënave paraprake të publikuara nga mediat turke, dyshohet se një vinç i madh është shembur mbi një furrë industriale ku përpunohej çeliku i lëngshëm.

Ekipet e emergjencës po punojnë për largimin e strukturave të shembura dhe verifikimin nëse ka ende punëtorë të bllokuar.

Ndërkohë, autoritetet turke kanë nisur hetimet për të përcaktuar shkaqet e shpërthimit dhe për të sqaruar nëse në fabrikë janë respektuar rregullat e sigurisë në punë.

/rtsh.al/