Promotori i njohur i boksit, Frank Warren, ka mbetur i shokuar nga dëmtimi i rëndë i pësuar nga Zak Miller gjatë përballjes me Gully Powar. Ai e ka cilësuar hematomën e krijuar në kokën e boksierit si dëmtimin më të frikshëm që ka parë në karrierën e tij mbi 40-vjeçare në këtë sport.

Ngjarja ndodhi të shtunën në mbrëmje, gjatë duelit mes dy boksierëve në Manchester. Një përplasje aksidentale e kokave shkaktoi një ënjtje të pazakontë në njërën anë të kokës së Millerit, e cila më pas u përhap edhe në anën tjetër.

Mjeku i Bordit Britanik të Kontrollit të Boksit, i pranishëm pranë ringut, e kontrolloi fillimisht dëmtimin dhe lejoi vazhdimin e ndeshjes. Megjithatë, në raundin e 10-të, pas një tjetër kontrolli mjekësor, u vendos ndërprerja e përballjes.

Tre gjyqtarët i dhanë fitoren me vendim unanim Gully Powar, ndërsa Miller u transportua menjëherë në spital, ku qëndroi gjatë natës nën vëzhgimin e mjekëve.

Promotori Frank Warren, 74 vjeç, nuk e fshehu tronditjen nga ajo që kishte parë.

“Ishte e tmerrshme. Sinqerisht, nuk kam parë kurrë diçka të tillë. Filloi në njërën anë të kokës dhe më pas u zhvendos në anën tjetër. Ishte e tmerrshme për të dhe shumë shqetësuese edhe për t'u parë”, deklaroi ai për “SunSport”.

Warren mbështeti vendimin e gjyqtarit dhe mjekut për të ndërprerë ndeshjen, duke theksuar se shëndeti i boksierit ishte përparësia kryesore.

“Gjyqtari dhe mjeku bënë gjënë e duhur duke e ndalur përballjen. Ai shkoi në spital për vëzhgim, por tani është kthyer në shtëpi. Ka kaluar një periudhë të vështirë, por është në gjendje të mirë dhe mund të boksojë sërish në të ardhmen”, u shpreh promotori.

Edhe menaxheri i Millerit, Kevin Maree, kishte konfirmuar se boksieri ishte pranë rikuperimit të plotë.

Në fund, Warren premtoi se kompania Queensberry, me të cilën është i lidhur Miller, do t'i ofrojë të gjithë mbështetjen e nevojshme gjatë rikuperimit të tij. Një mbrëmje që duhej të ishte një tjetër sfidë sportive, por që përfundoi me shqetësim të madh për shëndetin e boksierit.