Kryeministri i Kosovës, Albin Kurti, ka zhvilluar një takim në Paris me disa personalitete franceze që kanë kontribuar ndër vite për Kosovën. Takimi u mbajt në prag të nisjes zyrtare të Forumit të Paqes në Paris, ku në fokus ishin zhvillimi ekonomik, investimet në siguri dhe mbrojtje, si dhe perspektiva euroatlantike e Kosovës.

Në takim morën pjesë ish-ministri francez i Mbrojtjes, Alain Richard, oficeri i ushtrisë Gilles Pernet, antropologia dhe studiuesja Véronique Nahoum-Grappe, drejtoresha e Qendrës Kulturore të Kosovës në Paris, Frédérique Duversin, si dhe gazetarja dhe ish-këshilltarja e Tribunalit të Hagës, Florence Hartmann.

Kurti bëri të ditur se diskutimet u përqendruan te zhvillimet në Kosovë, situata e sigurisë dhe çështjet e drejtësisë ndërkombëtare.

“Biseduam për përparimin demokratik dhe zhvillimin e qëndrueshëm e të vazhdueshëm ekonomik, për investimet në siguri e në mbrojtje, për aktgjykimin e padrejtë të 16 shtatorit dhe angazhimin për korrigjimin e tij në apel”, tha Kurti.

Kryeministri i Kosovës foli gjithashtu për planet e qeverisë në mandatin e ri dhe rëndësinë e mbështetjes franceze në rrugën e Kosovës drejt integrimit euroatlantik.

Personalitetet e pranishme kanë pasur angazhim të ndryshëm në mbështetje të Kosovës ndër vite, përfshirë çështjen e ndërhyrjes së NATO-s më 1999, dokumentimin e luftës, drejtësinë ndërkombëtare dhe promovimin e kulturës kosovare në Francë.

/rtsh.al/