Franca ka akuzuar Iranin se qëndron pas një serie sulmesh kibernetike që shënjestruan sistemet e frigoriferëve dhe ngrirësve në qindra supermarkete në vend.

Ministri i Jashtëm francez, Jean-Noël Barrot, e cilësoi sulmin si të paprecedentë për nga përmasat dhe agresiviteti, duke paralajmëruar se përgjegjësit do të përballen me sanksione në nivel evropian.

Sulmi ndodhi më 11 tetor, kur hakerat morën kontrollin e softuerit që menaxhon temperaturën e pajisjeve frigoriferike. Si pasojë, ushqimet e freskëta dhe ato të ngrira u dëmtuan, me humbje që vlerësohen në miliona euro.

Më shumë se 100 supermarkete të rrjetit Coopérative U dhe 180 dyqane të Intermarché dhe markës Netto u prekën nga sulmi. Probleme u raportuan edhe në rrjetet Carrefour, Monoprix dhe E.Leclerc. Në disa dyqane, temperaturat e frigoriferëve raportohet se u rritën deri në 50 gradë Celsius gjatë natës.

“Ky është sulmi i parë kibernetik në shkallë të gjerë që synon sabotimin në territorin tonë kombëtar dhe përbën një sulm të madh ndaj interesave të kombit dhe sigurisë së popullit francez”, deklaroi Barrot.

Ai bëri të ditur se qeveria franceze ka thirrur ambasadorin iranian në Paris për t’i paraqitur një protestë zyrtare.

Ndërkohë, prokuroria në Paris ka hapur një hetim ndaj drejtuesit të një njësie kibernetike të lidhur me Gardën Revolucionare Islamike të Iranit, të identifikuar si “Shahid Kaveh”, si dhe ndaj dy zëvendësve të tij.

Shqetësimet janë shtuar pasi javën e kaluar një valë tjetër sulmesh kibernetike goditi më shumë se 100 supermarkete në disa vende evropiane, përfshirë Belgjikën, Luksemburgun, Suedinë, Irlandën, Holandën, Estoninë dhe Finlandën.

/rtsh.al/