“Veliaj priti mesazh tjetër në burg”, Koka debat me deputetin për kryebashkiakun

“Veliaj priti mesazh tjetër në burg”, Koka debat me deputetin për kryebashkiakun
Gazetari Bledian Koka ka ngritur pikëpyetje lidhur me publikimin e bisedës mes kryebashkiakut të Tiranës, Erion Veliaj, dhe ministrit Toni Gogu.

I ftuar në emisionin “Now” në Euronews Albania, Koka u shpreh se Veliaj e bëri publike bisedën pasi, sipas tij, nuk kishte marrë mesazhin që i ishte përcjellë përmes ministrit.

“Veliaj priti një mesazh tjetër në burg dhe i erdhi një tjetër”, u shpreh gazetari, duke lënë të kuptohet se pas kësaj situate mund të ketë pasur një keqkuptim apo një komunikim të ndryshëm nga ai që pritej.

Gjatë diskutimit në studio, Koka iu drejtua deputetit socialist Erjon Malaj me një pyetje lidhur me qëndrimin e Veliajt në detyrën e kryebashkiakut të Tiranës.

“A mendoni se në këtë pikë Veliaj duhet t’ia delegojë detyrën dikujt tjetër?”, pyeti Koka.

Nga ana e tij, deputeti socialist Erjon Malaj pranoi se situata aktuale në drejtimin e kryeqytetit nuk është normale, por theksoi se Veliaj e ka marrë këtë përgjegjësi përmes votës së qytetarëve.

“Qyteti nuk po funksionon në këtë formë, kjo është e dukshme, por votat që ka marrë nga socialistët i kanë dhënë këtë përgjegjësi. Ne nuk mund të komentojmë vendimet e drejtësisë”, u shpreh Malaj.