Guvernatori i Bankës së Francës: Jemi në një pozicion të mirë për të pretenduar postin e kryeekonomistit të BQE-së

Guvernatori i Bankës së Francës, Emmanuel Moulin tha të martën se do të ishte legjitime që një francez të merrte punën e kryeekonomistit në Bankën Qendrore Evropiane.

“Ky është një pozicion që nuk e kemi pasur kurrë në historinë tonë – posti i kryeekonomistit. Ne kemi disa kandidate shumë të mira. Në fakt, disa kandidate femra shumë të mira për këtë rol prandaj do të ishte plotësisht legjitime që Franca të mbante këtë pozicion”, tha Moulin.

Udhëheqësit e eurozonës do të zgjedhin një zëvendësues për Presidenten e BQE-së, Christine Lagarde – e cila tha muajin e kaluar se do të japë dorëheqjen më 7 shkurt – dhe dy anëtarë të tjerë kyç të bordit, Isabel Schnabel, e cila drejton operacionet e tregut, dhe Kryeekonomistin Philip Lane, në muajt e ardhshëm.

Të tre emërimet mund të negociohen në të njëjtin proces. Janë paraqitur vetëm dy kandidatë për këtë post të lartë. Spanja nominoi Pablo Hernandez de Cos, Drejtorin e Përgjithshëm të Bankës për Zgjidhje Ndërkombëtare, dhe Holanda nominoi Klaas Knot , ish-kreun e bankës qendrore.

“Të dy kandidatët janë bankierë qendrorë që janë jashtëzakonisht kompetentë, pragmatikë. Dhe kështu, nuk mendoj se do të ketë ndonjë ndryshim. Të dy kandidatët përfaqësojnë një vazhdimësi të qasjes së Christine Lagarde”, tha Moulin.