Policia Metropolitane në Londër ka nisur shqyrtimin e disa denoncimeve të reja ndaj aktorit dhe komedianit britanik Russell Brand, pas dënimit të tij me 10 vite e 6 muaj burg për përdhunim dhe sulme seksuale. Mbikëqyrësi i hetimit, Andy Furphy, tha për BBC Breakfast se gjatë gjyqit dhe pas përfundimit të tij, policia ka marrë disa raportime të reja nga persona që kanë dhënë informacione ose kanë ngritur pretendime për vepra të mundshme penale.
Furphy bëri të ditur se hetuesit po vlerësojnë aktualisht informacionet e mbledhura, për të përcaktuar nëse ato lidhen me sjellje të tjera të dyshimta apo nëse përbëjnë vepra penale që kërkojnë hetim të mëtejshëm. Ai theksoi se puna e policisë nuk ka përfunduar ende.
Ndërkohë, Brand është nën hetim edhe për akuzat për përdhunim të ngritura nga dy gra të tjera. Ai është marrë në pyetje nga policia në lidhje me këto pretendime, por hetimet vijojnë.
Aktori u dënua të hënën me 10 vite e 6 muaj burg, pasi u shpall fajtor për përdhunim dhe sulme seksuale ndaj katër grave, për ngjarje që kanë ndodhur gjatë periudhës 2004-2009. Konkretisht, ai mori 9 vite burg për përdhunim, ndërsa për tre akuzat e tjera të sulmit seksual u dënua përkatësisht me 18, 9 dhe 8 muaj burg. Këto dënime të fundit do të vuajnë njëkohësisht me njëri-tjetrin.
Gjatë shpalljes së vendimit, gjyqtari Joel Bennathan e cilësoi Brand si një “grabitqar seksual”, duke kritikuar gjithashtu atë që e përshkroi si arrogancën e tij të jashtëzakonshme.
Duke folur për gjendjen e grave që dëshmuan gjatë procesit gjyqësor, Furphy tha se disa prej tyre e kanë përjetuar me vështirësi të madhe vëmendjen e shtuar mediatike. Ai shtoi se ato kanë vijuar të mbështeten nga policia, pavarësisht presionit dhe ekspozimit publik.
Sipas tij, dënimi nuk do të ishte i mundur pa guximin dhe qëndrueshmërinë e viktimave gjatë gjithë procesit të drejtësisë. “Është diçka thellësisht personale dhe shumë e rëndë të jesh viktimë e përdhunimit apo sulmit seksual dhe të duhet t’ia tregosh këtë dikujt, e aq më tepër policisë”, deklaroi Furphy.
Një zëdhënës i Policisë Metropolitane konfirmoi se disa persona kanë kontaktuar grupin hetimor gjatë gjyqit dhe pas përfundimit të tij, për të dhënë informacione ose për të raportuar pretendime të mundshme penale. Sipas tij, detektivët po i vlerësojnë këto të dhëna në kuadër të hetimeve që vijojnë.
