Një aksident i rëndë rrugor ka tronditur Bullgarinë, ku 11 persona kanë humbur jetën dhe 50 të tjerë kanë mbetur të plagosur pas një përplasjeje masive që përfshiu dhjetëra automjete në një segment të mbuluar nga mjegulla të autostradës A1.  Aksidenti ndodhi të martën në autostradën që lidh kryeqytetin Sofje me qytetin bregdetar të Burgasit, në lindje të vendit. Sipas raportimeve, përplasja nisi pas një goditjeje mes një autobusi dhe një kamioni, në drejtim të Burgasit.

Pamjet e publikuara nga mediat lokale tregojnë një skenë të rëndë, me makina dhe kamionë të grumbulluar në të gjashtë korsitë e autostradës. Disa automjete janë shkatërruar plotësisht, të përmbysura ose kanë përfunduar jashtë rrugës.

Në vendngjarje mbërritën menjëherë forcat e policisë, zjarrfikësit dhe ekipet e ambulancës. Ministria e Brendshme bëri të ditur se 50 persona të plagosur janë transportuar në spital, ndërsa disa të tjerë mbetën të bllokuar brenda automjeteve. Sekretari i Përgjithshëm i Ministrisë së Brendshme, Lyubomir Nikolov, deklaroi se mjegulla dyshohet të ketë qenë shkaku kryesor i aksidentit.

Kryeministri Rumen Radev e cilësoi ngjarjen si një tragjedi të rëndë. Ai njoftoi se kishte vënë në dispozicion edhe mjete ajrore për evakuimin e të plagosurve dhe se planifikonte të vizitonte vendin e aksidentit.

Ndërkohë, presidentja e Komisionit Evropian, Ursula von der Leyen, e cila ndodhej për një vizitë në Bullgari, shprehu ngushëllimet për viktimat dhe solidaritetin me ekipet e shpëtimit. Ajo bëri të ditur se do ta ndërpriste vizitën më herët për shkak të tragjedisë.

Autoritetet kanë bërë të ditur se prioritet mbetet shpëtimi i personave të bllokuar, ndërsa hetimet për zbardhjen e plotë të rrethanave të aksidentit do të nisin pas përfundimit të operacioneve të emergjencës.

/rtsh.al/