Veliaj kërkesë urgjente Klosit dhe SPAK: Dua të marr pjesë në Asamblenë e PS

Erion Veliaj kërkon të marrë pjesë në mbledhjen e Asamblesë Kombëtare të Partisë Socialiste, e parashikuar të zhvillohet më 14 nëntor 2026, pavarësisht se ndodhet në paraburgim në IEVP Fier. Kryebashkiaku i Tiranës u ka dërguar një kërkesë zyrtare Sekretarit të Përgjithshëm të PS-së, Blendi Klosi, dhe prokurorit të çështjes në SPAK, duke kërkuar që t’i mundësohet pjesëmarrja në këtë mbledhje, qoftë fizikisht, qoftë përmes një lidhjeje të drejtpërdrejtë me videokonferencë.

Në shkresën e datës 10 nëntor, Veliaj argumenton se masa e sigurisë “arrest në burg” kufizon lirinë e tij të lëvizjes, por nuk duhet të përkthehet automatikisht në humbjen e të drejtave politike dhe statutore që gëzon brenda Partisë Socialiste.

Ai thekson se vijon të jetë anëtar i Asamblesë Kombëtare dhe i Kryesisë së PS-së, drejtues politik i qarkut Tiranë, kryetar i PS-së në Tiranë, si dhe kryetar i zgjedhur i Bashkisë së Tiranës. Për këtë arsye, kërkon të ketë mundësi të ndjekë diskutimet, të marrë fjalën, të paraqesë propozime dhe të jetë pjesë e vendimmarrjes së strukturave drejtuese të partisë.

Veliaj i kërkon Sekretarit të Përgjithshëm të PS-së të marrë masat organizative dhe teknike për pjesëmarrjen e tij, ndërsa SPAK-ut i kërkon shqyrtimin urgjent të mundësisë ligjore dhe bashkërendimin me autoritetet e burgjeve.

Në shkresë, ai sqaron se nuk po kërkon ndryshimin apo pezullimin e masës së sigurisë, por vetëm gjetjen e një mënyre për të ushtruar të drejtat e tij politike pa cenuar kushtet e paraburgimit.

Veliaj kërkon të flasë në Asamblenë e PS-së: Pjesëmarrja nuk është vetëm të marrësh dijeni për vendimet

Një pjesë e veçantë e kërkesës i drejtohet Blendi Klosit, të cilit Veliaj i kërkon fillimisht të njoftohet zyrtarisht për orarin, vendin, rendin e ditës dhe dokumentet që do të shqyrtohen në mbledhjen e 14 nëntorit.

Nëse autoritetet kompetente nuk autorizojnë praninë e tij fizike, ai kërkon që nga ambientet e IEVP Fier të krijohet mundësia për një lidhje të drejtpërdrejtë audiovizive. Përmes saj, pretendon se duhet t’i garantohet jo vetëm ndjekja e mbledhjes, por edhe mundësia për të marrë fjalën, për të diskutuar dhe për të paraqitur propozime.

Si alternativë tjetër, në rast se nuk realizohet as pjesëmarrja në distancë, Veliaj kërkon që qëndrimi i tij me shkrim t’u paraqitet anëtarëve të Asamblesë dhe të përfshihet në dokumentacionin e mbledhjes.

Në argumentimin e tij, kryebashkiaku nënvizon se pjesëmarrja në një organ kolegjial nuk nënkupton thjesht njohjen me vendimet e marra, por përfshin të drejtën për të dëgjuar, për t’u dëgjuar, për të diskutuar dhe për të qenë pjesë e procesit vendimmarrës, në përputhje me statutin e partisë.

Çfarë i kërkon Veliaj SPAK-ut?

Në pjesën e dytë të shkresës, Veliaj i drejtohet prokurorit të çështjes në SPAK, duke kërkuar shqyrtimin e mundësisë ligjore për pjesëmarrjen e tij fizike në mbledhjen e Asamblesë Kombëtare.

Ai kërkon që prokurori, sipas kompetencave përkatëse, të japë miratimin e nevojshëm ose t’ia përcjellë pa vonesë kërkesën autoritetit që ka kompetencën për të vendosur.

Në rast se dalja nga ambientet e paraburgimit nuk mund të autorizohet, Veliaj kërkon që të shqyrtohet alternativa e videokonferencës, e cila sipas tij nuk kërkon largimin nga institucioni dhe mund të realizohet nën mbikëqyrjen e administratës penitenciare.

Ai argumenton se një zgjidhje e tillë do të garantonte ushtrimin e të drejtave politike pa cenuar zbatimin e masës së sigurisë apo kushtet e sigurisë në institucionin e paraburgimit.

Veliaj kërkon gjithashtu që çdo vendim për kufizimin ose refuzimin e pjesëmarrjes së tij të mbështetet në një bazë konkrete ligjore dhe të jetë i arsyetuar, duke marrë në konsideratë edhe mundësinë e pjesëmarrjes në distancë si alternativë më pak kufizuese.

“Privimi nga liria nuk duhet të shndërrohet në përjashtim nga jeta politike”

Në mbështetje të kërkesës së tij, Veliaj u referohet neneve 17 dhe 46 të Kushtetutës së Shqipërisë, si dhe nenit 11 të Konventës Evropiane për të Drejtat e Njeriut, të cilat, sipas argumentimit të tij, mbrojnë të drejtën për organizim dhe pjesëmarrje në jetën politike.

Ai thekson se çdo kufizim i këtyre të drejtave duhet të ketë bazë ligjore dhe të respektojë parimin e proporcionalitetit.

Duke qenë se mbledhja është caktuar për datën 14 nëntor, kryebashkiaku kërkon që përgjigjja të jepet në kohë, në mënyrë që të mund të organizohet pjesëmarrja e tij. Sipas tij, mungesa e një përgjigjeje përpara zhvillimit të Asamblesë do ta bënte të pamundur ushtrimin e kësaj të drejte në procesin konkret të vendimmarrjes politike.

Në përfundim të shkresës, Veliaj përsërit kërkesën që PS-ja dhe autoritetet kompetente të bashkërendojnë veprimet për t’i mundësuar praninë në Asamblenë Kombëtare, duke e mbyllur argumentimin me qëndrimin: “Privimi nga liria nuk duhet të shndërrohet, përtej kufizimeve të domosdoshme dhe të ligjshme, në përjashtim nga jeta politike dhe nga ushtrimi i funksioneve statutore që vazhdoj të mbaj”.

Fier, më 10.11.2026

DREJTUAR:

Sekretarit të Përgjithshëm të Partisë Socialiste të Shqipërisë

Prokurorit të çështjes pranë Prokurorisë së Posaçme kundër Korrupsionit dhe Krimit të Organizuar (SPAK)

PËR DIJENI:

Drejtorisë së Përgjithshme të Burgjeve

Drejtorisë së IEVP Fier

LËNDA: Kërkesë urgjente për garantimin e pjesëmarrjes dhe ushtrimin e të drejtave statutore në mbledhjen e Asamblesë Kombëtare të Partisë Socialiste, të datës 14 nëntor 2026, përmes pjesëmarrjes fizike ose, alternativisht, nëpërmjet videokonferencës.

I nderuar z. Sekretar i Përgjithshëm,

I nderuar z. Prokuror,

Në datën 14 nëntor 2026 është njoftuar zhvillimi i mbledhjes së Asamblesë Kombëtare të Partisë Socialiste të Shqipërisë, organ më i rëndësishëm i drejtimit dhe vendimmarrjes politike të partisë në mes dy kongreseve.

Unë jam anëtar i Asamblesë Kombëtare, i Kryesisë së Partisë Socialiste, drejtues politik i qarkut Tiranë, kryetar i Partisë Socialiste Tiranë, si dhe kryetar i zgjedhur i Bashkisë Tiranë. Për rrjedhojë, pjesëmarrja ime në këtë mbledhje lidhet drejtpërdrejt me ushtrimin e të drejtave që më burojnë nga anëtarësia dhe funksionet e mia në organet drejtuese të partisë.

Aktualisht ndodhem në paraburgim në IEVP Fier, në zbatim të masës së sigurimit personal të caktuar ndaj meje. Kjo rrethanë më kufizon lirinë e lëvizjes, por nuk sjell, në vetvete, humbjen e të drejtave të mia politike dhe statutore, për aq sa ushtrimi i tyre është i pajtueshëm me kufizimet e ligjshme që burojnë nga masa e sigurimit dhe regjimi i paraburgimit. E drejta për organizim dhe pjesëmarrje në jetën politike gëzon mbrojtje kushtetuese dhe konventore. Nenet 17 dhe 46 të Kushtetutës, si dhe neni 11 i Konventës Evropiane për të Drejtat e Njeriut, kërkojnë që kufizimet e ushtrimit të këtyre të drejtave të kenë bazë ligjore dhe të respektojnë parimin e proporcionalitetit.

Pjesëmarrja ime në mbledhjen e Asamblesë Kombëtare ka rëndësi të veçantë, pasi synoj të paraqes personalisht qëndrimet, propozimet dhe kërkesat e mia për çështje që lidhen me funksionimin e Partisë Socialiste, ushtrimin e përgjegjësive të organeve të saj dhe të ardhmen e organizatës politike ku bëj pjesë.

Për këto arsye, kërkoj të më mundësohet pjesëmarrja në mbledhjen e Asamblesë Kombëtare të datës 14 nëntor 2026, mundësisht në mënyrë fizike dhe nëse kjo nuk realizohet, nëpërmjet një lidhjeje të drejtpërdrejtë audiovizive.

I. KËRKESA DREJTUAR SEKRETARIT TË PËRGJITHSHËM TË PARTISË SOCIALISTE

Në cilësinë e autoritetit përgjegjës për organizimin dhe koordinimin e veprimtarisë së organeve të partisë, ju kërkoj të ndërmerrni masat organizative dhe teknike për të garantuar pjesëmarrjen time efektive në mbledhjen e Asamblesë Kombëtare.

Në mënyrë të veçantë, kërkoj:

1. Të më njoftohen zyrtarisht ora, vendi, rendi i ditës dhe dokumentet që do të shqyrtohen në mbledhjen e datës 14 nëntor 2026.

2. Të merren masat për mundësimin e pjesëmarrjes sime fizike, nëse kjo autorizohet nga autoritetet kompetente.

3. Në alternativë, të sigurohet infrastruktura teknike për lidhjen time të drejtpërdrejtë me videokonferencë nga IEVP Fier, me mundësi për të ndjekur diskutimet, për të marrë fjalën, për të paraqitur propozime dhe për të ushtruar të drejtat e tjera që më njeh Statuti.

4. Të bashkërendohen paraprakisht veprimet me administratën e IEVP Fier dhe Drejtorinë e Përgjithshme të Burgjeve për realizimin e lidhjes audiovizive, duke respektuar kërkesat e sigurisë së institucionit.

5. Nëse pjesëmarrja ime e drejtpërdrejtë nuk mundësohet, të më jepet mundësia që qëndrimi im i shkruar t’i paraqitet Asamblesë dhe të pasqyrohet në dokumentacionin e mbledhjes, pa e konsideruar këtë alternativë si zëvendësim automatik të së drejtës për pjesëmarrje.

Pjesëmarrja në një organ kolegjial nuk kufizohet vetëm te marrja dijeni për vendimet e tij. Ajo përfshin mundësinë reale për të dëgjuar, për t’u dëgjuar, për të diskutuar dhe për të marrë pjesë në vendimmarrje, sipas rregullave statutore.

II. KËRKESA DREJTUAR PROKURORIT TË ÇËSHTJES

Duke qenë se ndodhem nën masën e sigurimit personal “arrest në burg”, ju kërkoj të shqyrtoni me urgjencë mundësinë ligjore të pjesëmarrjes sime fizike në mbledhjen e Asamblesë Kombëtare dhe sipas kompetencës suaj, të jepni miratimin përkatës ose t’ia përcillni kërkesën pa vonesë autoritetit kompetent për vendimmarrje. Nëse pjesëmarrja fizike nuk mund të realizohet, kërkoj që të shqyrtohet dhe të mundësohet pjesëmarrja ime nëpërmjet videokonferencës nga ambientet e IEVP Fier.

Kjo alternativë nuk kërkon largimin tim nga institucioni, nuk cenon zbatimin e masës së sigurimit dhe mund të organizohet nën mbikëqyrjen e administratës penitenciare, duke respektuar kushtet ligjore dhe të sigurisë. Theksoj se kërkesa ime nuk synon ndryshimin, pezullimin apo shmangien e masës së sigurimit personal. Ajo synon vetëm gjetjen e një mënyre proporcionale për ushtrimin e një të drejte politike dhe statutore, pa cenuar qëllimet e ligjshme të paraburgimit. Për këtë arsye, kërkoj që çdo kufizim apo refuzim të mbështetet në një bazë konkrete ligjore, të arsyetohet dhe të marrë në shqyrtim mundësinë e pjesëmarrjes në distancë si alternativë më pak kufizuese.

III. URGJENCA E SHQYRTIMIT

Duke qenë se mbledhja e Asamblesë Kombëtare është caktuar për datën 14 nëntor 2026, kërkoj që kjo kërkesë të shqyrtohet menjëherë dhe që vendimmarrja të më komunikohet në kohë të mjaftueshme për organizimin e pjesëmarrjes. Mungesa e një përgjigjeje përpara zhvillimit të mbledhjes do ta bënte praktikisht të pamundur ushtrimin e të drejtës sime për të marrë pjesë në një proces konkret të vendimmarrjes politike.

Privimi nga liria nuk duhet të shndërrohet, përtej kufizimeve të domosdoshme dhe të ligjshme, në përjashtim nga jeta politike dhe nga ushtrimi i funksioneve statutore që vazhdoj të mbaj.

Në përfundim, kërkoj që Sekretari i Përgjithshëm i Partisë Socialiste dhe autoritetet kompetente të bashkërendojnë veprimet e nevojshme për të garantuar pjesëmarrjen time efektive në mbledhjen e Asamblesë Kombëtare të datës 14 nëntor 2026, fizikisht ose, alternativisht, nëpërmjet videokonferencës.

Me respekt,

ERION VELIAJ

Anëtar i Asamblesë Kombëtare të Partisë Socialiste