Prokuroria e Posaçme dhe Byroja Kombëtare e Hetimit kanë aktualisht 119 vende vakante, ndërsa numri efektiv i punonjësve është 220 nga 339 pozicione që parashikon struktura organike. Shifra u bë publike gjatë raportimit të SPAK në Komisionin për Nismat Qytetare, Bashkëpunimin dhe Mbikëqyrjen Institucionale, ku u diskutua projektbuxheti për vitin 2027.
Për vitin e ardhshëm, SPAK ka kërkuar shtimin e 25 pozicioneve të reja të punës, tetë në Prokurorinë e Posaçme dhe 17 në BKH. Pjesa më e madhe e vendeve vakante janë në strukturën e Byrosë Kombëtare të Hetimit.
Një nga kërkesat e reja të SPAK për vitin 2027 është edhe përfshirja e një psikologu institucional, i cili do të ofrojë mbështetje për hetuesit e BKH-së, për shkak të presioneve psikologjike, kërcënimeve dhe ngarkesës së lartë që shoqërojnë punën e tyre.
Drejtori i Buxhetit dhe Menaxhimit Financiar në SPAK, Armand Shini, tha se psikologu do të ketë gjithashtu rol në procesin hetimor, duke asistuar gjatë intervistimit të dëshmitarëve të rrezikuar dhe bashkëpunëtorëve të drejtësisë.
“Psikologia institucionale është një kërkesë e shtuar, e cila është argumentuar me ndihmën që do të japë psikologu edhe për stafin e BKH-së, pasi stafi i BKH-së përballet me presione psikologjike, me kërcënime dhe ngarkesë të lartë që karakterizojnë natyrën e veprimtarisë hetimore.
Psikologu do të asistojë edhe në intervistat që do të bëjnë hetuesit, për dëshmitarët e rrezikuar, por edhe bashkëpunëtorët e drejtësisë. Do të shërbejë edhe për procesin hetimor”, deklaroi Shini.
Në projektbuxhetin e vitit 2027 janë parashikuar edhe investime në pajisje dhe infrastrukturë. Konkretisht, 15 milionë lekë për pajisje zyre, përfshirë kasaforta, grirëse dokumentesh dhe mobilje; 30 milionë lekë për blerjen e tetë automjeteve dhe 174 milionë lekë për pajisje elektronike dhe infrastrukturë teknologjike.
