Qeveria shqiptare ka nxjerrë në shitje pronat e sekuestruara nga biznesmeni Ylli Ndroqi. Ministria e Ekonomisë dhe Inovacionit shpalli në buletinin e Prokurimeve Publike ankandin për shitjen e 6 shoqërive tregtare, të cilat deri më tani kanë qenë nën administrimin e Agjencisë së Administrimit të Pasurive të Sekuestruara dhe të Konfiskuara.
Sipas buletinit, procesi i shitjes do të shtrihet në dy ditë radhazi në datën 24 dhe 25 nëntor, ku peshën kryesore financiare e mban kompania “Yldon” sh.p.k.
Për këtë shoqëri, ku shiten 100% të kuotave, ankandi do të hapet me një vlerë fillestare prej 236.3 milionë lekësh lekësh ose 2.6 milionë euro.
Për 5 shoqëritë e tjera, vlerat fillestare të ankandeve janë simbolike dhe variojnë nga 10 deri në 30 mijë euro.
Sipas shpalljes, të gjitha seancat e ankandeve do të zhvillohen përpara komisionit të ngritur pranë Drejtorisë së Shitjes së Pronës Publike.
Shoqëritë e nxjerra për shitje u konfiskuan me vendim të Gjykatës së Posaçme Kundër Korrupsionit dhe Krimit të Organizuar në prill të vitit 2022.
Nga ajo kohë menaxhimi i tyre është bërë nga Agjencia e Administrimit të Pasurive të Sekuestruara dhe Konfiskuara. Por tashmë, qeveria ka vendosur shitjen përfundimtare të tyre tek privatët që mund të kenë interes./Kapitali.al
