Arrestohet një gjerman në Kosovë, sekuestrohen 43 armë të gjata automatike

Policia e Kosovës, në bashkëpunim me Prokurorinë Speciale, ka arrestuar një gjerman nën dyshimin për përfshirje në veprimtari kriminale që lidhen me krimin e organizuar dhe trafikimin e kundërligjshëm të armëve

Sipas njoftimit të përbashkët të Policisë dhe Prokurorisë Speciale, i dyshuari me inicialet L.S. është ndaluar në rajonin e Gjilanit, ku pas kontrollit dhe skanimit të automjetit me të cilin po udhëtonte, janë zbuluar dhe sekuestruar 43 armë të gjata automatike.

Me urdhër të Prokurorisë Speciale, të dyshuarit i është caktuar masa e ndalimit për 48 orë. Ai dyshohet për veprat penale “Pjesëmarrja ose organizimi i grupit kriminal të organizuar” dhe “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse”.

Ndërkohë, Prokuroria Speciale dhe Policia e Kosovës po vazhdojnë hetimet për zbardhjen e plotë të rrethanave të rastit, përfshirë verifikimin e origjinës dhe destinacionit të armëve të sekuestruara.

Autoritetet kanë bërë të ditur se publiku do të informohet për zhvillimet e mëtejshme, duke respektuar procedurat ligjore dhe integritetin e hetimit.