Më 13 shtator 2026, Kuvendi i Kosovës i dha votëbesimin Qeverisë së katërt të drejtuar nga Albin Kurti. Në favor të saj votuan 62 deputetë, tetë kundërshtuan dhe nuk pati asnjë abstenim. Për krijimin e ekzekutivit votuan 53 deputetë të Lëvizjes Vetëvendosje dhe nëntë përfaqësues të komuniteteve joshumicë.
Kjo përbërje e shumicës parlamentare ka ngritur diskutime për aftësinë e saj për të qëndruar e bashkuar gjatë gjithë mandatit. Meqë votat e komuniteteve joshumicë janë thelbësore për ruajtjen e shumicës, ndryshimet e mundshme në qëndrimet politike, interesat e veçanta të deputetëve apo vendimet e rëndësishme që do të marrë Qeveria mund të ndikojnë në stabilitetin e saj.
Të lidhura
None found
Meqë çdo votë mund të jetë vendimtare për miratimin e ligjeve, buxhetit dhe çështjeve të tjera me rëndësi për shtetin, ruajtja e kohezionit në Kuvend do të jetë një nga sfidat kryesore të Qeverisë Kurti. Humbja e mbështetjes nga cilido prej deputetëve të shumicës mund të krijojë pasiguri për vazhdimin e qeverisjes dhe funksionimin e institucioneve, duke e rikthyer vendin në një tjetër periudhë krize politike.
Për “Bota sot”, njohës të zhvillimeve politike kanë dhënë vlerësime të ndryshme lidhur me mundësinë që Qeveria Kurti 4 ta përfundojë mandatin.
Mehmeti: 62 vota janë të mjaftueshme
Opinionisti Gani Mehmeti e konsideron numrin prej 62 deputetësh të mjaftueshëm për funksionimin demokratik të institucioneve. Sipas tij, vazhdimësia e kësaj shumice do të varet nga vullneti i deputetëve për ta mbështetur bashkëqeverisjen.
Mehmeti vëren se Qeveria është krijuar vetëm me një votë më shumë se minimumi prej 61 votash, çka e bën atë të ekspozuar ndaj çdo ndryshimi në qëndrimet e deputetëve.
“Për qëndrueshmërinë e një qeverie nevojitet mbështetja e më shumë se 50 për qind të deputetëve të Kuvendit, numër që mjafton për votime, zgjedhje dhe qeverisje. Me këtë përbërje u krijua edhe Qeveria e Kosovës dhe u zgjodhën Kryeministri, Qeveria e Kuvendi i Republikës së Kosovës pas zgjedhjeve të 7 qershorit 2026. Rezultati ishte 53 deputetë të LVV-së dhe nëntë deputetë të komuniteteve joshumicë, pra gjithsej 62 deputetë”, ka deklaruar Mehmeti.
Ai ka theksuar se kjo shifër mjafton për punën e institucioneve, për aq kohë sa deputetët e shumicës vazhdojnë t’i japin përkrahje Qeverisë.
“Sipas parimeve të jetës demokratike, kjo shumicë është e mjaftueshme. Kështu qëndron situata përderisa mbështetja ruhet nga të 62 deputetët. Megjithatë, shumica është në kufi, sepse mjafton që një deputet të mos votojë dhe kjo mund të ndikojë në vendimmarrje. Bëhet fjalë për qeverisjen me shumicën më të ngushtë”, është shprehur ai.
Pavarësisht kësaj, Mehmeti nuk mendon se numri aktual e pengon domosdoshmërisht Qeverinë që ta përfundojë mandatin. Në vlerësimin e tij, faktori përcaktues do të jetë uniteti dhe gatishmëria politike e deputetëve për të qëndruar në koalicionin aktual.
“Për sa kohë të gjithë deputetët janë të angazhuar për bashkëqeverisje, kjo shumicë mund të jetë e qëndrueshme dhe duhet të vazhdojë deri në përfundim të mandatit. Edhe pse duket e brishtë, ajo mund të qëndrojë”, ka thënë Mehmeti.
Ai ka lënë të hapur edhe mundësinë e zgjerimit të shumicës parlamentare, nëse ndonjë deputet i opozitës vendos ta mbështesë Qeverinë pasi të vlerësojë se ajo po jep rezultate për vendin.
“Kur llogarisim një votë që mund të humbet, duhet të marrim parasysh edhe mundësinë e një vote që mund të fitohet”, ka deklaruar Mehmeti.
Si përfundim, opinionisti vlerëson se përbërja aktuale nuk duhet konsideruar vetëm si dobësi për shumicën qeverisëse. Sipas tij, mbështetja mund të ruhet, por edhe të zgjerohet gjatë mandatit, në varësi të qëndrimit të deputetëve që mundësuan formimin e Qeverisë.
Qaka: Nuk ka garanci për stabilitet afatgjatë
Politologu Adnan Qaka ka dhënë një vlerësim më skeptik për jetëgjatësinë e Qeverisë Kurti IV. Ai ka thënë se, megjithëse ekzekutivi u zgjodh me 62 vota, kjo shumicë nuk përbën garanci për stabilitet të qëndrueshëm politik.
Sipas Qakës, nëntë deputetët e komuniteteve joshumicë, krahas 53 deputetëve të Lëvizjes Vetëvendosje, janë vendimtarë për ruajtjen e shumicës qeverisëse.
Ai ka paralajmëruar se një ndryshim i qëndrimit të cilitdo prej deputetëve që aktualisht e mbështesin Qeverinë do të mund të ndryshonte drejtpërdrejt raportet politike në Kuvend.
“Qeveria Kurti IV është formuar me 62 vota në Kuvendin e Republikës së Kosovës, nga 53 deputetë të Lëvizjes Vetëvendosje dhe nëntë deputetë të komuniteteve joshumicë, kryesisht të komuniteteve jo-serbe. Ky numër i siguron asaj mbështetjen e domosdoshme për krijimin, miratimin e ligjeve të zakonshme dhe funksionimin e përgjithshëm të institucioneve. Megjithatë, një shumicë e tillë nuk garanton stabilitet të qëndrueshëm politik, pasi diferenca e vogël mbi pragun minimal e bën Qeverinë të cenueshme ndaj ndryshimit të qëndrimeve të deputetëve mbështetës”, ka deklaruar Qaka.
Politologu ka rikujtuar se Kushtetuta e Kosovës kërkon të paktën 61 vota të deputetëve për zgjedhjen ose rrëzimin e Qeverisë.
Nisur nga kjo, ai ka shpjeguar se opozita do të kishte nevojë për tri vota nga radhët e shumicës aktuale në mënyrë që ta rrëzonte Qeverinë përmes një mocioni mosbesimi.
“Edhe nëse opozita do të vepronte e bashkuar dhe do të siguronte votat e të 58 deputetëve të saj, për ta rrëzuar Qeverinë Kurti IV do t’i nevojiteshin së paku edhe tri vota nga deputetët e shumicës qeverisëse. Për këtë arsye, kohezioni brenda shumicës është veçanërisht i rëndësishëm, pasi çdo lëkundje mund të krijojë mundësi reale për ndryshimin e raportit të forcave në Kuvend”, është shprehur ai.
Qaka ka sqaruar se mocioni i mosbesimit mund të iniciohet me 40 deputetë, ndërsa për miratimin e tij duhen 61 vota.
Sipas tij, kjo procedurë përbën një prej sfidave kryesore me të cilat mund të përballet Qeveria Kurti IV.
“Opozita nuk është e detyruar ta ketë që në fillim shumicën e nevojshme për rrëzimin e Qeverisë. Ajo ka nevojë vetëm për numrin kushtetues të deputetëve që kërkohet për inicimin e mocionit dhe dërgimin e tij në procedurë parlamentare”, ka thënë Qaka.
Duke analizuar të ardhmen e ekzekutivit, politologu ka parashikuar se opozita do të kërkojë të sigurojë përkrahjen e deputetëve të shumicës. Ai nuk e ka përjashtuar as skenarin e zgjedhjeve të parakohshme.
“Vlerësimi im politik është se Qeveria Kurti IV do të përballet me probleme serioze të qëndrueshmërisë dhe se mundësia që mandati i saj të përfundojë para afatit kushtetues mbetet e madhe. Mendoj se kjo Qeveri mund të zgjasë maksimalisht dy vjet, ndonëse zhvillimet konkrete politike do të përcaktojnë jetëgjatësinë e saj”, ka deklaruar ai.
Qaka ka shprehur kritika edhe për punën e deritanishme të Qeverisë së Albin Kurtit. Sipas tij, ekzekutivi nuk ka paraqitur një strategji të plotë për zhvillimin ekonomik dhe institucional të Kosovës.
Ai ka veçuar ekonominë, shëndetësinë, drejtësinë, arsimin dhe diplomacinë si sektorë ku rezultatet nuk kanë qenë në nivelin e pritjeve.
“Nuk është paraqitur një plan i besueshëm dhe gjithëpërfshirës zhvillimor që do të sillte transformim të rëndësishëm ekonomik dhe institucional. Përvoja e viteve të qeverisjes së Lëvizjes Vetëvendosje nuk ka treguar realizim të kënaqshëm të projekteve të mëdha zhvillimore dhe investimeve që do të sillnin ndryshime strukturore në ekonominë e Kosovës. Përkundrazi, vendi ka shënuar ngecje në disa fusha jetike, veçanërisht në ekonomi, shëndetësi, drejtësi, arsim dhe diplomaci”, ka vlerësuar Qaka.
Ai ka shtuar se vijimi i së njëjtës qasje politike dhe institucionale nuk pritet të sjellë ndryshime të mëdha në qeverisjen e vendit.
“Sipas vlerësimit tim, për fat të keq, qeverisja e Lëvizjes Vetëvendosje po përsërit të njëjtat modele të dobëta që e kanë shoqëruar politikën institucionale të Kosovës që nga përfundimi i luftës dhe nuk ka arritur të sjellë ndryshimin e madh që kanë pritur qytetarët. Për rrjedhojë, në kushtet aktuale politike dhe me qasjen që ka ndjekur deri tani, nuk pres që kjo Qeveri të realizojë transformimin e nevojshëm ekonomik, institucional dhe shoqëror të Republikës së Kosovës”, ka përfunduar politologu Adnan Qaka për “Bota sot”.
