Kryetari i Grupit Parlamentar të PD-së, Gazment Bardhi, ka reaguar lidhur me debatet për Reformën Zgjedhore, duke hedhur poshtë pretendimet për bojkot të opozitës.
Bardhi akuzon mazhorancën se po zvarrit qëllimisht procesin dhe po shmang rekomandimet e OSBE/ODIHR-it dhe Komisionit të Venecias, ndërsa kërkon që ndryshimet ligjore të garantojnë zgjedhje të lira, të ndershme dhe të barabarta.
Opozita nuk e ka bojkotuar asnjëherë Komisionin e Posaçëm për Reformën Zgjedhore. Ky është një fakt publik dhe lehtësisht i verifikueshëm. Nuk ka pasur asnjë mbledhje të thirrur të këtij Komisioni në të cilën përfaqësuesit tanë të mos kenë qenë të pranishëm.
Ajo që po ndodh është një përpjekje e mazhorancës për të devijuar dhe penguar punën e Komisionit, duke e zhvendosur vëmendjen drejt çështjeve dytësore, të cilat nuk lidhen me rekomandimet e OSBE/ODIHR-it dhe të Komisionit të Venecias.
Ky fokusim në çështje që nuk adresojnë standardet për zgjedhje të lira, të ndershme dhe të barabarta po zvarrit procesin dhe po pengon përmbushjen e detyrimeve që ka Shqipëria për garantimin e integritetit të procesit zgjedhor.
Sa i përket projektligjit për financimin e partive politike, drafti fillestar, i hartuar nga Komisioni i Posaçëm, u është përcjellë për vlerësim urgjent Zyrës së OSBE/ODIHR-it dhe Komisionit të Venecias. Ekspertët e këtyre institucioneve kanë përcjellë opinionet dhe rekomandimet e tyre të plota.
Qëndrimi i opozitës është i qartë: të gjitha vërejtjet dhe rekomandimet e këtyre institucioneve duhet të reflektohen plotësisht në tekstin e projektligjit. Ky proces nuk mund të konsiderohet i përfunduar dhe projektligji nuk mund të ecë përpara pa u adresuar plotësisht rekomandimet e OSBE/ODIHR-it dhe të Komisionit të Venecias.
Opozita do të vijojë të insistojë që Reforma Zgjedhore të përmbushë jo thjesht një detyrim formal apo procedural, por edhe standardet dhe kërkesat e përcaktuara nga Komisioni Europian: rikthimin e besimit të publikut te procesi zgjedhor, garantimin e konkurrencës së ndershme politike dhe mbrojtjen e integritetit të zgjedhjeve.
Reforma Zgjedhore duhet të prodhojë garanci reale për zgjedhje të lira, të ndershme dhe të barabarta, dhe jo të shndërrohet në një proces formal që shmang adresimin e problemeve themelore të demokracisë zgjedhore në Shqipëri.
