Pasagjerët dhe kalimtarët mbetën të habitur nga një skenë e pazakontë në Detroit të SHBA-së, ku dy kuaj u futën brenda një autobusi publik dhe më pas dolën nga dera e pasme. Ngjarja u filmua dhe videoja e shkurtër po qarkullon në rrjetet sociale.

Incidenti ndodhi të shtunën e kaluar, kur dy kuajt hynë në autobus përmes derës së përparme dhe përshkuan automjetin përpara se të dilnin nga dera e pasme. Ende nuk dihet se sa pasagjerë ndodheshin në autobus në momentin e pazakontë. Autoritetet e transportit kanë nisur hetimet për të zbardhur rrethanat e ngjarjes. Departamenti i Transportit të Detroitit (DDOT) konfirmoi se ishte në dijeni të incidentit, duke deklaruar se dy kuajt kishin kaluar përmes një autobusi të ndaluar.

“Po ndërmarrim veprimet e duhura për të adresuar këtë incident, pasi është në kundërshtim me politikën e DDOT dhe mund të krijojë një udhëtim të rrezikshëm dhe të pakëndshëm për pasagjerët tanë”, thuhet në deklaratën e departamentit. DDOT sqaroi gjithashtu se në autobusët publikë lejohen vetëm kafshët e shërbimit. Sipas rregullave, ato duhet të jenë gjatë gjithë kohës nën kontrollin e personit me aftësi të kufizuara, nuk duhet të zënë një vend dhe duhet të qëndrojnë në dysheme ose në prehrin e personit.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: