Dy persona dhe një kompani që është në falimentim janë kallëzuar penalisht nga Policia Financiare, nën dyshimin se kanë fshehur detyrime tatimore dhe kanë përfituar në mënyrë të paligjshme. Sipas hetimeve, veprimet dyshohet se janë kryer gjatë viteve 2022–2023.
Njëri nga të dyshuarit ishte person i autorizuar, ndërsa tjetri pronar dhe menaxher i kompanisë. Gjatë periudhës përkatëse, nga llogaria e saj u tërhoqën rreth 145 mijë euro pa mbulim përkatës, ndërsa rreth 353 mijë euro iu dhanë hua personave fizikë pa u pasqyruar në dokumentacionin tatimor.
Të lidhura
None found
Dy të dyshuarit dyshohet gjithashtu se nuk deklaruan në bilancin tatimor të vitit 2023 detyrime të vjetruara me vlerë rreth 2.4 milionë euro. Po ashtu, pretendohet se përvetësuan mallra tregtare nga stoqet e kompanisë, me vlerë rreth 243 mijë euro, pa paguar detyrimet tatimore përkatëse.
Policia Financiare vlerëson se si pasojë e këtyre veprimeve është shmangur pagesa e tatimit mbi të ardhurat personale, tatimit mbi fitimin dhe TVSH-së, në shumën e përgjithshme prej rreth 378 mijë eurosh.
Kallëzimi penal për veprën “Fshehje tatimore” i është dorëzuar Prokurorisë Themelore Publike në Shkup.
