Barcelona është favoritja kryesore për të fituar LaLiga-n në sezonin 2026/27, sipas parashikimeve të kompanisë Stats Perform, të publikuara nga OPTA. Skuadra e drejtuar nga Hansi Flick ka 64,76% shanse për të fituar kampionatin dhe për të siguruar titullin e tretë radhazi.

Pas 12 javësh kampionat, Barcelona kryeson renditjen, e ndjekur nga Real Madridi, Atletico Madridi dhe Betisi. Megjithatë, sipas analizës statistikore, katalanasit pritet ta mbyllin sezonin me 89 pikë, përpara madrilenëve, të cilët pritet të marrin 85 pikë.

Real Madridi ka 31,52% mundësi për t'u shpallur kampion, ndërsa Atletico Madridi renditet i treti në këtë garë me vetëm 3,46%. Shanset e Betisit janë edhe më të vogla, me 0,24%.

Sipas projeksioneve, këto katër skuadra do të siguronin kualifikimin në Champions League. Në rast se Spanja përfiton një vend të pestë në këtë kompeticion, gara do të përfshijë edhe klube të tjera.

Real Sociedad parashikohet të përfundojë në vendin e pestë dhe të sigurojë pjesëmarrjen në Europa League, duke lënë pas rivalin e saj, Athletic Bilbaon. Ky i fundit do të renditej i shtati dhe do të përfaqësonte Spanjën në Conference League.

Parashikimet sjellin edhe disa ndryshime interesante në pjesën tjetër të tabelës. Rayo Vallecano pritet të ngjitet nga vendi i 14-të në të nëntin, ndërsa Levante nga pozita e 17-të në të 13-tën. Në krahun tjetër, Getafe parashikohet të pësojë rënien më të madhe, duke kaluar nga vendi i 15-të në të 19-tin.

Sa i përket luftës për mbijetesë, parashikimet e OPTA-s janë befasuese. Osasuna, Getafe dhe Malaga projektohen si tri skuadrat që do të zbresin në kategorinë e dytë.

Espanyoli parashikohet të shpëtojë me 41,93 pikë, vetëm pak më shumë se Osasuna, së cilës i llogariten 41,89 pikë. Ndërkohë, Elche dhe Valencia pritet të sigurojnë mbijetesën me nga 42 pikë.

Megjithatë, këto janë vetëm projeksione statistikore. Me 78 pikë ende në lojë, gjithçka mbetet e hapur dhe renditja mund të ndryshojë ndjeshëm deri në fund të sezonit.