Ministrja e Ekonomisë, Delina Ibrahimaj, ka kundërshtuar teorinë konspirative se sektori bankar në Shqipëri kontrollohet nga hebrenjtë, duke e cilësuar atë një pretendim që nuk përputhet me të dhënat mbi pronësinë dhe strukturën e bankave që operojnë në vend.
Gjatë një interviste, Ibrahimaj tha se kjo teori qarkullon në vende të ndryshme të botës, por theksoi se në rastin e Shqipërisë, mjafton të shqyrtohen bankat më të mëdha dhe të dhënat për kapitalin, depozitat dhe portofolin e kredive për të parë se pretendimi nuk qëndron.
“Teoria kryesore konspirative që qarkullon kudo në botë, por edhe në Shqipëri, është se sektori bankar kontrollohet nga hebrenjtë. Kjo është një mit global. Nëse shohim statistikat e bankave më të mëdha, ato që kanë portofolin më të madh të kredive, portofolin më të madh të depozitave dhe kapitalet më të mëdha, nuk është fare kjo situata. Nuk është aspak kështu”, u shpreh ministrja.
Ajo tha se ka hasur edhe raste kur persona të njohur për të kanë besuar këtë pretendim, si pasojë e diskursit publik dhe deklaratave që qarkullojnë në media.
Sipas Ibrahimajt, përhapja e teorive të tilla pa u sfiduar me fakte mund të ndikojë te qytetarët, të cilët mund t’i marrin si të vërteta deklaratat që dëgjojnë në televizione.
Në intervistë u përmendën edhe deklarata të bëra në një televizion kombëtar, ku janë hedhur pretendime për kontrollin e sistemit bankar nga “masonët izraelitë”. Ministrja tha se kur ide të tilla transmetohen pa u përballur me të dhënat dhe faktet, ato mund të krijojnë bindje të gabuara te publiku.
Ajo e lidhi këtë fenomen me përhapjen më të gjerë të teorive konspirative për ekonominë shqiptare, përfshirë pretendimet se vendi është një “narkoshtet” dhe se zhvillimi i sektorit të ndërtimit është tërësisht pasojë e parave të pista.
Ibrahimaj tha se nuk mohon ekzistencën e rrezikut të pastrimit të parave në sektorin e ndërtimit, por theksoi se ky është një sektor që konsiderohet me risk të lartë edhe në vende të tjera dhe për këtë arsye monitorohet nga institucionet përgjegjëse.
“Ka pastrim parash në sektorin e ndërtimit në Shqipëri dhe në të gjitha vendet e tjera të botës. Është një sektor i cili është i ndjeshëm dhe ku mund të krijohen hapësira për pastrim parash. Për këtë arsye institucionet që merren me parandalimin e pastrimit të parave e kanë sektorin e ndërtimit në fokus dhe në vëmendje”, deklaroi ajo.
Ministrja kundërshtoi gjithashtu pretendimin se të gjitha ndërtimet dhe kullat në Shqipëri financohen me para të pista. Sipas saj, sektori i ndërtimit përfshin jo vetëm banesat dhe kullat, por edhe hotele, magazina, infrastrukturë rrugore dhe investime të tjera.
Ajo tha se një pjesë e konsiderueshme e financimit të ndërtimeve kryhet përmes bankave, ndërsa një pjesë tjetër realizohet përmes marrëveshjeve të këmbimit dhe pagesave në natyrë mes investitorëve dhe nënkontraktorëve.
Ibrahimaj përmendi edhe daljen e Shqipërisë nga lista gri e FATF-së, duke thënë se vendi ka ngritur mekanizmat dhe institucionet e nevojshme për monitorimin dhe parandalimin e pastrimit të parave. Sipas saj, pritet një tjetër vlerësim ndërkombëtar në fund të vitit.
Në këtë kontekst, ministrja tha se akuzat për një ekonomi tërësisht të bazuar në aktivitet kriminal nuk përputhen me vlerësimet e institucioneve ndërkombëtare që monitorojnë ekonominë dhe sistemin financiar shqiptar.
#DelinaIbrahimaj #Bankat #TeoriKonspirative #Dezinformimi #Ekonomia