Toni Kroos ka shprehur shqetësime për mbrojtjen e Barcelonës, duke dyshuar se ekipi i Hansi Flick mund t’u bëjë ballë kundërshtarëve më të fortë në Ligën e Kampionëve.
Gjermani, ish-mesfushor, tha se i pëlqen futbolli që luan skuadra katalanase. Megjithatë, sipas tij, mbrojtësve u mungon cilësia e nevojshme për të mbështetur një qasje kaq sulmuese pa lënë hapësira për kundërsulme.
Të lidhura
None found
“Më pëlqen mënyra si luan Barcelona, por mbrojtja e saj nuk ka cilësinë e jashtëzakonshme që kërkohet për të luajtur kështu pa u ekspozuar. Lihen shumë hapësira dhe mbrojtësit nuk kanë shpejtësinë apo aftësitë e jashtëzakonshme defensive për t’i mbuluar ato”.
Kroos vuri në dukje se në Ligën e Kampionëve Barcelona ndeshet me ekipe të afta të shënojnë disa herë brenda një takimi, si edhe me kundërshtarë që mbrohen shumë mirë dhe ia vështirësojnë zhvillimin e lojës së saj të zakonshme.
“Në situata të tilla duhet të dish të mbrohesh gjithashtu. Barcelona synon gjithmonë të krijojë më shumë raste se kundërshtari, por në Ligën e Kampionëve përballesh me skuadra që mund të shënojnë disa gola në një ndeshje”, shtoi ai.
Si pikë të fortë në prapavijën e Barcelonës, Kroos përmendi Pau Cubarsin, të cilin e konsideron mbrojtësin më të mirë të ekipit. Ai vlerësoi forcën dhe shpejtësinë e tij në duelet individuale.
“Për mua, Cubarsi është qartësisht mbrojtësi më i mirë i tyre. Ka forcën për të fituar duelet një kundër një dhe shpejtësinë për t’u përballur me situata të vështira. Por, te mbrojtësit e tjerë nuk shoh dikë që do t’i besoja të mbronte i vetëm ndaj një sulmuesi, kur pas shpinës ka 30 metra hapësirë”, tha ish-lojtari i Real Madridit.
Në përfundim, Kroos përmendi Dayot Upamecanon e Bayern Munichut si shembullin e një mbrojtësi që mund të përballet i vetëm me sulmuesin, edhe kur ka shumë hapësirë pas vetes. Sipas tij, Barcelona nuk ka një lojtar të tillë.
“Barcelona nuk ka dikë si Upamecano, një mbrojtës që mund ta lësh krejtësisht vetëm në një duel një kundër një, me 30 metra hapësirë pas tij, dhe të jesh sërish i sigurt se do ta përballojë situatën. Me Cancelo, Gerard Martín dhe lojtarë të ngjashëm, kjo është shumë më e vështirë”, përfundoi Kroos.
