Një situatë e rrezikshme është regjistruar në aksin rrugor që lidh Shqipërinë me Kosovën, pranë doganës së Morinës, ku masive shkëmbinjsh kanë rënë në mes të rrugës duke bllokuar qarkullimin e automjeteve.
Pamjet e mbërritura në redaksinë e JOQ Albania tregojnë gurë dhe shkëmbinj me përmasa të mëdha të shembur nga shpati, të cilët kanë zënë të dyja korsitë e lëvizjes. Drejtuesit e mjeteve janë detyruar të ndalojnë, ndërsa në zonë është krijuar një radhë e gjatë automjetesh.
Qytetari që ka dërguar videon tregon se ndodhej në drejtim të Kosovës kur është përballur me bllokimin e papritur. Ai ngre si mundësi pakujdesinë dhe reshjet e shiut që kanë përfshirë zonën, por shkaku i shembjes nuk është konfirmuar ende.
Rënia e masiveve shkëmbore në një aks kaq të rëndësishëm për lëvizjen mes dy vendeve përbën rrezik serioz për drejtuesit e mjeteve dhe udhëtarët. Mjafton një moment i vetëm që një automjet të gjendet nën gurët që shkëputen nga mali.
Autoritetet rrugore dhe strukturat e emergjencave duhet të ndërhyjnë për pastrimin e rrugës, vlerësimin e qëndrueshmërisë së shpatit dhe garantimin e sigurisë përpara se qarkullimi të normalizohet. Nuk mjafton vetëm largimi i shkëmbinjve nga asfalti, nëse rreziku i shembjeve të tjera mbetet.
Për momentin, drejtuesit e mjeteve që udhëtojnë drejt Kosovës duhet të tregojnë kujdes dhe të informohen për gjendjen e këtij aksi përpara se të nisen.
