Një njësi artilerie ukrainase qëllon mbi pozicionet ruse në rajonin e Donetskut, Ukrainë, në janar
Autoritetet ruse kanë regjistruar vdekjen e më shumë se 11 mijë shtetasve të huaj nga afro 100 vende të ndryshme gjatë luftës kundër Ukrainës, sipas të dhënave konfidenciale të agjencisë shtetërore të statistikave të Rusisë, Rosstat.
Informacioni vjen nga një arkiv me më shumë se 11 milionë certifikata vdekjeje, së bashku me të dhëna shoqëruese, si vendlindja, shtetësia dhe vendi ku kanë ndërruar jetë personat. Të dhënat u siguruan nga grupi bjellorus i opozitës Cyber Partisans dhe operacioni ukrainas i hakerave Silent Crow. Më pas, ato iu dhanë Bloomberg dhe një grupi të vogël mediash të tjera.
Bloomberg raportoi më herët se Kremlini ka regjistruar rreth 400 mijë vdekje të lidhura me luftën që prej pushtimit në shkallë të plotë të Ukrainës, pothuajse pesë vjet më parë.
Në këtë bilanc përfshihen 11 335 shtetas të huaj, persona që ose kanë lindur jashtë Rusisë, ose kanë pasur shtetësi të huaj. Vdekjet janë regjistruar në periudhën nga 24 shkurti 2022 deri në fund të gushtit 2026 dhe janë lidhur shprehimisht me luftën, përmes kodeve përkatëse ose përshkrimeve që përmbanin terma si “operacion ushtarak”, “bombardim” apo “dronë”.
Rosstat nuk iu përgjigj një kërkese për koment.
Të dhënat japin një pasqyrë se si Kremlini ka arritur të mbajë në këmbë luftën kundër Ukrainës, edhe pse forcat e tij hasin vështirësi për të përparuar në fushëbetejë dhe pësojnë humbje gjithnjë e më të rënda.
Moska nuk publikon të dhëna për numrin e shtetasve të huaj që ka rekrutuar, ndërsa presidenti Vladimir Putin ka bërë përpjekje të mëdha për të mos pranuar përmasat e viktimave të luftës. Megjithatë, ndërsa konflikti ka marrë gjithnjë e më shumë jetë rusësh, Kremlini duket se ka shtuar edhe përdorimin e luftëtarëve të huaj.
Sipas Dmytro Usov, sekretarit të Shtabit Koordinues për Trajtimin e të Burgosurve të Luftës në Ukrainë, deri në tetor Rusia kishte rekrutuar rreth 46 mijë shtetas të huaj. Ai tha se Ukraina ka kapur robër luftëtarë kundërshtarë nga 59 vende dhe se Rusia planifikon të rekrutojë edhe 18 500 shtetas të huaj gjatë këtij viti. Një vlerësim i veçantë nga kreu i shërbimit sekret ukrainas jep një shifër më të ulët, rreth 28 mijë luftëtarë të huaj.
Të dhënat e Rosstat tregojnë se numri i vdekjeve të të huajve të lidhura me luftën është rritur afërsisht në të njëjtin ritëm me bilancin e përgjithshëm të viktimave të Rusisë, duke u shtuar më shumë se tetë herë që nga pushtimi: nga rreth 630 në vitin 2022 në mbi 5 500 në vitin 2025
Të dhënat e hakuara ishin të paplota dhe në disa raste jokonsistente, veçanërisht për vitin 2026, pasi regjistrimi i vdekjeve në luftime mund të zgjasë muaj, madje edhe vite. Raportime të veçanta sugjerojnë se numri i viktimave ruse është rritur gjatë këtij viti, duke arritur nivele rekord muajin e kaluar.
Kremlini ka mohuar raportimet se përdor metoda mashtruese për të rekrutuar luftëtarë jashtë vendit. Megjithatë, pas publikimit të historive për të huaj që kanë humbur jetën në vijën e frontit, pasi ishin joshur drejt Rusisë me premtime shpesh të rreme për shtetësi, para ose punësim, disa vende, përfshirë Kirgistanin, Kazakistanin, Kenian dhe Ganën, kanë shprehur shqetësim. Ministri i Jashtëm rus, Sergei Lavrov, tha në gusht se Rusia kishte ngritur një organ të posaçëm për të shqyrtuar kërkesat e vendeve të huaja.
Regjistrat e shqyrtuar nga Bloomberg sugjerojnë se ushtria ruse është mbështetur më së shumti te shtetet ish-sovjetike, të cilat Moska i konsideron pjesë të sferës së saj të ndikimit. Rreth 3 700 prej të huajve të vrarë ishin shtetas ukrainas ose kishin lindur në Ukrainë pas shpalljes së pavarësisë së saj, me shpërbërjen e Bashkimit Sovjetik në vitin 1991. Nga rastet ku përfshihej edhe adresa e banimit, shumica e personave jetonin në zonat e pushtuara të Ukrainës lindore dhe jugore.
Meqenëse bilanci përfshin edhe shtetas rusë të lindur jashtë vendit, disa prej tyre mund të kenë qenë rusë që nga lindja, si fëmijë të familjeve sovjetike ose ruse që jetonin jashtë Rusisë. Të tjerë mund t’u përkasin pakicave të ndryshme etnike.
Rreth 80 për qind e pjesës tjetër të viktimave vinin nga vende të tjera ish-sovjetike. Pak më shumë se 6 000 persona kishin lindur jashtë Rusisë, por në momentin e vdekjes zotëronin shtetësinë ruse.
Një vend varrimi për ushtarët e vrarë gjatë pushtimit të Ukrainës, në Kostroma, Rusi
Për qëllimet e kësaj analize, personat e lindur jashtë Rusisë, por brenda territorit të Bashkimit Sovjetik përpara shpërbërjes së tij, janë llogaritur si të huaj vetëm nëse zotëronin shtetësinë e një vendi tjetër.
Në bazën e të dhënave nuk figurojnë vdekje të shtetasve të Koresë së Veriut të lidhura me luftën, megjithëse ky vend ka dërguar mijëra trupa për të ndihmuar Rusinë. Kjo sugjeron se Rusia nuk ka lëshuar certifikata vdekjeje për asnjë nga viktimat koreano-veriore, ndoshta sepse ato ishin pjesë e njësive të huaja dhe jo individë që iu bashkuan forcave ruse.
Për këtë arsye, si dhe për shkak të vonesave në raportim dhe vështirësive të tjera në regjistrimin e viktimave në luftime, baza e të dhënave pothuajse me siguri e nënvlerëson numrin e përgjithshëm të luftëtarëve të huaj të vrarë.
Disa persona mund të jenë raportuar si të zhdukur, disa trupa mund të mos jenë identifikuar, ndërsa të tjerë mund të kenë vdekur muaj më vonë nga plagët e marra në luftë, pa u specifikuar kjo lidhje në regjistra. Vdekje të tjera mund të jenë regjistruar në kategori që nuk kanë lidhje me luftën.
Një mural që paraqet ushtarë rusë dhe koreano-veriorë, në Vladivostok, në një fotografi të publikuar nga mediat shtetërore ruse në gusht
Përpjekjet e Rusisë për rekrutim duket se janë zhvilluar në disa valë. Të dhënat tregojnë një përqendrim të lartë të vdekjeve të shtetasve nepalezë në vitet 2023 dhe 2024, të shtetasve nga Sri Lanka dhe Kina në vitet 2024 dhe 2025, ndërsa nga fundi i vitit 2025 u shtuan viktimat nga Kolumbia, Kenia dhe Nigeria.
Gjithashtu, rreth 340 prej personave të vrarë vinin nga Afrika, ku Rusia ka intensifikuar metodat e rekrutimit. Shumica e këtyre vdekjeve janë regjistruar nga viti 2025 e tutje, ndërsa kontingjentet më të mëdha vinin nga Egjipti, Kameruni, Nigeria, Kenia dhe Gana.
Rreth 300 regjistrime u përkisnin shtetasve rusë të lindur në Gjermani përpara vitit 1992, kryesisht në qytete të garnizoneve ushtarake të Gjermanisë Lindore, si Potsdami dhe Magdeburgu, ku forcat sovjetike ishin të stacionuara deri në vitin 1994.
Pothuajse të gjitha viktimat e huaja në radhët ushtarake, 99 për qind e totalit, ishin burra. Nga 159 gratë që humbën jetën, 154 vinin nga territoret e pushtuara të Ukrainës.
Silent Crow dhe Cyber Partisans njoftuan më 1 nëntor se kishin depërtuar në infrastrukturën e brendshme të Rosstat, duke fituar akses në rreth 25 mijë kompjuterë dhe duke nxjerrë afërsisht 23 terabajt të dhëna, përfshirë informacione mbi humbjet ushtarake të Rusisë.
Disa ditë më vonë, Rosstat deklaroi se kishte zbuluar sulme të synuara kibernetike ndaj sistemeve të saj në periudhën 29 tetor – 1 nëntor, por se nuk kishte gjetur prova se bazat e të dhënave ishin komprometuar apo se informacionet konfidenciale ishin nxjerrë jashtë. Agjencia tha se po rikthente funksionimin e sistemeve pasi një sulm kishte nxjerrë jashtë funksionit disa pjesë të infrastrukturës së saj.
Një njësi artilerie ukrainase qëllon mbi pozicionet ruse në rajonin e Donetskut, Ukrainë, në janar
Një vend varrimi për ushtarët e vrarë gjatë pushtimit të Ukrainës, në Kostroma, Rusi
Një mural që paraqet ushtarë rusë dhe koreano-veriorë, në Vladivostok, në një fotografi të publikuar nga mediat shtetërore ruse në gusht
