Një ngjarje e rëndë është regjistruar në Brooklyn të Nju Jorkut, ku shembja e një ndërtese trekatëshe ka shkaktuar dy viktima dhe të paktën 17 persona të plagosur, mes tyre edhe shtatë fëmijë.
Ngjarja ndodhi pasditen e së mërkurës, më 11 nëntor, në zonën e Flatbush, ku ndërtesa u shemb në drejtim të një kantieri ndërtimi pranë saj, duke lënë disa persona të bllokuar nën rrënoja.
Sipas autoriteteve lokale, katër prej të plagosurve ndodhen në gjendje kritike, ndërsa të tjerët kanë marrë lëndime të ndryshme. Mes të shpëtuarve nga rrënojat raportohet edhe një grua shtatzënë.
Ndërkohë, shkaku i shembjes mbetet ende nën hetim. Sipas autoriteteve të qytetit, në truallin ngjitur me ndërtesën po kryheshin punime gërmimi për ndërtimin e një objekti të ri.
Hetuesit po shqyrtojnë nëse punimet pranë godinës mund të kenë ndikuar në shembjen e saj.
Operacionet e kërkim-shpëtimit vijuan gjatë natës, ndërsa autoritetet po kryejnë edhe kontrolle për sigurinë e ndërtesave përreth.
