Një alarm për bombë është dhënë këtë të enjte në stacionin hekurudhor Calais-Fréthun, në departamentin Pas-de-Calais, në veri të Francës.
Lajmi është bërë i ditur nga Prefektura e Pas-de-Calais përmes një njoftimi në rrjetin social X, ku konfirmohet se alarmi është aktiv dhe se autoritetet kanë nisur verifikimet për të përcaktuar nëse ekziston një kërcënim real.
Prefektura paralajmëron se situata mund të ndikojë në trafikun hekurudhor në zonën përreth, duke shkaktuar vonesa dhe ndërprerje të mundshme të qarkullimit të trenave.
Në njoftimin e saj, autoritetet franceze u bëjnë thirrje qytetarëve të tregojnë kujdes dhe të ndjekin informacionet zyrtare të publikuara nga shërbimet përkatëse dhe kompania hekurudhore SNCF.
Autoritetet pritet të japin informacione të tjera në varësi të zhvillimit të situatës.
