Shkencëtarët po paralajmërojnë për rreziqe të rënda ndaj shëndetit publik në mbarë botën nga një fenomen klimatik me përmasa të pazakonta, i quajtur “Super El Niño”. Sipas tyre, temperaturat ekstreme mund të marrin qindra mijëra jetë deri në shkurt të vitit 2027.
Një raport i Climate Impact Lab vlerëson se i nxehti ekstrem mund të shkaktojë deri në 451 mijë vdekje shtesë nga qershori i vitit 2026 deri në shkurt të vitit 2027. Bëhet fjalë për viktima mbi numrin e zakonshëm të vdekjeve që lidhen me temperaturat e larta.
Të lidhura
None found
Epidemiologët e kanë përshkruar ndikimin e mundshëm të El Niño-s si një krizë shëndetësore me përmasa pandemike, duke shtuar shqetësimet. Studiuesit i kanë kërkuar Organizatës Botërore të Shëndetësisë që ta trajtojë fenomenin si emergjencë ndërkombëtare të shëndetit publik.
El Niño është një dukuri natyrore klimatike, e lidhur me ngrohjen e pazakontë të ujërave të Oqeanit Paqësor, që ndikon në modelet e motit në të gjithë planetin. Këtë herë pritet një intensitet veçanërisht i lartë, ndërsa ndryshimet klimatike mund t’i rëndojnë më tej pasojat.
Parashikimet tregojnë se ditët me temperatura ekstreme mund të jenë 44% më të shumta se në vitet normale. Krahas të nxehtit, mund të shfaqen edhe thatësira, përmbytje, zjarre masive dhe probleme në furnizimin me ushqime.
Pasojat më të rënda pritet të ndihen në vendet e Jugut Global. Ndër më të rrezikuarat është Nigeria, ku parashikohen rreth 31,400 vdekje shtesë për shkak të temperaturave të larta. Edhe Indonezia, Sudani, India dhe Brazili përballen me rreziqe të konsiderueshme.
Organizata Botërore Meteorologjike ka paralajmëruar se El Niño do të intensifikohet gjatë muajve të ardhshëm dhe mund të zgjasë deri në shkurt të vitit 2027. Studiuesit sqarojnë se 451 mijë viktima përbëjnë një projeksion shkencor, jo një parashikim të sigurt. Ata kërkojnë masa parandaluese, mes tyre sisteme paralajmërimi për valët e të nxehtit, qendra freskimi dhe forcim të shërbimeve shëndetësore.
