Ndahet nga jeta në moshën 26-vjeçare sportistja, historia e saj preku botën e bodybuilding-ut

Bota e fitnesit dhe bodybuilding-ut është në zi pas lajmit për ndarjen nga jeta të sportistes dhe influencueses skoceze Alix Small, e cila u shua në moshën vetëm 26-vjeçare.

Small, me origjinë nga Forfar i Skocisë, ndërroi jetë më 8 nëntor. Lajmi i trishtë u bë publik nga nëna e saj, Karen Small, si dhe nga persona të afërt me sportisten. Ndërkohë, shkaku i vdekjes nuk është bërë ende i ditur.

Alix Small ishte një emër i njohur në botën e bodybuilding-ut, ku arriti të ndërtojë një karrierë të rëndësishme, pavarësisht vështirësive të mëdha që kishte kaluar në jetën e saj personale.

Historia e saj kishte nisur me një betejë të vështirë kundër anoreksisë. Në moshën 15-vjeçare, ajo u përball me këtë çrregullim të të ushqyerit, duke arritur në një peshë prej rreth 32 kilogramësh.

Megjithatë, më vonë gjeti te bodybuilding-u një rrugë për të rindërtuar jetën dhe marrëdhënien me trupin e saj. Në një intervistë për STV News në vitin 2021, Small kishte treguar se ky sport e kishte ndihmuar të përqendrohej te forca dhe performanca, përtej pamjes fizike.

Karriera e saj sportive mori një tjetër drejtim në moshën 19-vjeçare, kur siguroi kartën profesionale të IFBB-së. Në vitin 2021, ajo fitoi garën Europa Pro në Spanjë, rezultat që i siguroi pjesëmarrjen në Olympia, një prej kompeticioneve më prestigjioze të bodybuilding-ut në botë.

Lajmi për vdekjen e saj ka shkaktuar trishtim në komunitetin e bodybuilding-ut, ku Alix Small do të kujtohet jo vetëm për arritjet sportive, por edhe për historinë e saj të vështirë dhe rrugëtimin e rikuperimit.

Një jetë e shkurtër, por një histori që preku shumë njerëz.