“Lara, babi po vjen!”/ Teresa Enke rrëfen detajet prekëse të orëve të fundit të ish-portierit gjerman
Shtatëmbëdhjetë vite pas tragjedisë që tronditi futbollin gjerman dhe atë botëror, Teresa Enke ka rikthyer në vëmendje një nga momentet më të dhimbshme të jetës së saj dhe të ish-portierit të Gjermanisë, Robert Enke.
Në një rrëfim në podcastin “Wie geht’s? Mit Robin Gosens”, Teresa ka zbuluar detaje nga orët e fundit të bashkëshortit të saj, i cili u nda nga jeta më 10 nëntor 2009, në moshën 32-vjeçare, pas një beteje të gjatë me depresionin.
Një nga detajet më prekëse lidhet me vizitën që Roberti kishte bërë në varrin e vajzës së tyre, Lara, pak para vdekjes. Vogëlushja kishte ndërruar jetë në vitin 2006, vetëm dy vjeçe, për shkak të një problemi të rëndë në zemër.
Sipas rrëfimit të Teresës, në një zemër të vendosur pranë varrit të vajzës, Roberti kishte shkruar fjalët: “Lara, babi po vjen!” Ajo ka theksuar se e njeh shkrimin e bashkëshortit dhe është e bindur se mesazhi ishte shkruar prej tij.
Rrëfimi i saj zbulon gjithashtu se mbrëmja e fundit që kaluan së bashku nuk kishte dhënë shenja të qarta të tragjedisë që do të ndodhte. Teresa tregoi se Roberti e kishte përqafuar, e kishte puthur dhe i kishte thënë: “Të dua”. Ajo kishte menduar se gjendja e tij po përmirësohej.
Megjithatë, më 10 nëntor 2009, kur Roberti nuk u kthye në shtëpi dhe nuk u paraqit në stërvitje, Teresa nisi të shqetësohej. Pak orë më vonë mori vesh lajmin tragjik.
Portieri gjerman kishte vuajtur prej vitesh nga depresioni, një problem që ishte rënduar edhe pas humbjes së vajzës së tyre. Teresa pranoi me dhimbje se të dy nuk kishin kërkuar ndihmën e nevojshme për ta përballuar atë periudhë.
Robert Enke ishte një prej portierëve më të vlerësuar të Gjermanisë, me tetë paraqitje për kombëtaren dhe me një karrierë të rëndësishme te Hannover 96. Vdekja e tij tronditi opinionin sportiv dhe riktheu në vëmendje rëndësinë e shëndetit mendor në sportin profesionist.
Pas tragjedisë, Teresa themeloi Robert-Enke-Stiftung, një fondacion që punon për ndërgjegjësimin mbi depresionin dhe mbështetjen e personave që vuajnë nga sëmundjet mendore, si dhe të fëmijëve me probleme kardiake.
