26 protestues janë dënuar me masë administrative, pas tubimit të zhvilluar pasditen e së mërkurës, në bulevardin “Dëshmorët e Kombit”. Sipas njoftimit të Policisë së tiranës, 26 qytetarët kanë bllokuar rrugën dhe kanë penguar qarkullimin e mjeteve të transportit, pavarësisht thirrjeve të përsëritura të efektivëve, nëpërmjet megafonit. Për secilin prej protestuesve është vendosur masa administrative gjobë me vlerë 5 000 lekë. Prej më shumë se 165 ditësh, protestuesit kanë mbajtur tubime kryesisht në Tiranë, kundër qeverisë së kryeministrit Edi Rama. Pjesëmarrësit, të mbledhur çdo ditë para Kryeministrisë dhe Ministrisë së Arsimit, refuzojnë dialogun dhe kërkojnë largimin e kabinetit qeveritar. Gjatë valëve të mëparshme të protestës në muajin tetor, tensionet u përshkallëzuan me hedhje sendesh dhe përdorim të gazit lotsjellës, duke sjellë mbi 150 persona të arrestuar dhe qindra të tjerë të proceduar penalisht në disa qytete të vendit.