Një i mitur 17 vjeçar është arrestuar në Elbasan si bashkëpunëtor në vendosjen e tritolit makinës së një shtetasja, natën e 5 nëntorit. Në kuadër të operacionit policor "Porosia" Policia e Elbasanit në bashkëpunim me atë të Durrësit vunë në pranga 17 vjeçarin nga Durrësi me iniciale B.N ndërsa më herët u arrestua një 43 vjeçar, sërish banues në Durrës i cili dyshohet se siguroi mjetin për arratisjen e autorëve të krimit. Ngjarja ndodhi në lagjen "28 nëntori" në Elbasan ndërsa pamjet filmike të kamerave të sigurisë në vendngjarje, çuan në identifikimin edhe 2 personave të tjerë të përfshirë. Policia e Elbasanit ka shpallur në kërkim edhe dy persona të tjetër banues në Elbasan, përkatësisht 36 dhe 33 vjeç. Personat e ndaluar akuzohen për "Shkatërrim të pronës me eksploziv" dhe "Mbajtje të materialeve shpërthyese". Ende nuk ka një pistë mbi shkaqet e shpërthimit pasi zonja që posedonte mjetin nuk ka precedentë të mëparshëm. Po ashtu, policia përjashton edhe detyrën e saj, si specialiste e një profili të ulët në Bashkinë e Elbasanit. Në bashkëpunim me prokurorinë, policia vijon hetimet për kapjen e personave të shpallur në kërkim dhe zbardhjen e shkaqeve të vendosjes së tritolit.