Ministri Nufi, në Forumin për të Ardhmen e Atlantikut të Veriut në Oslo: Shqipëria, aktive në forcimin e bashkëpunimit brenda NATO-s

Ministri i Mbrojtjes, Ermal Nufi mori pjesë në Forumin për të ardhmen e Atlantikut të Veriut 2026, që zhvillohet në Oslo të Norvegjisë.

Ky forum organizohet nga qeveritë e Mbretërisë së Bashkuar dhe asaj norvegjeze, me pjesëmarrjen e përfaqësuesve të nivelit të lartë politik, ushtarak dhe të industrisë së mbrojtjes nga vendet aleate.

Nga bordi i aeroplanmbajtëses britanike HMS Prince of Wales, Ministri Nufi theksoi rëndësinë e këtij takimi për forcimin e bashkëpunimit mes aleatëve, veçanërisht në drejtim të pikave strategjike dhe urave të komunikimit mes aktorëve të Aleancës në të dy anët e Atlantikut.

Gjatë këtij Forumi, Ministri Nufi është takuar me homologun e tij norvegjez Tore O. Sandvik dhe Nënsekretarin Parlamentar të Shtetit në Ministrinë e Punëve të Jashtme të Mbretërisë së Bashkuar Lord Wood of Anfield.

Në fokus kanë qenë sfidat e sigurisë euroatlantike dhe domosdoshmëria që NATO të ruajë vëmendjen në të gjitha drejtimet strategjike.

Përgjatë takimeve, Ministri Nufi ka theksuar se siguria e Europës nuk përfundon në Veriun e Largët. “Ballkani Perëndimor dhe veçanërisht Kosova duhet të mbeten në vëmendjen e Aleancës.”, është shprehur ai.

Ndër të tjera, Ministri Nufi ka cilësuar se: “Integrimi i Kosovës në NATO është, sipas nesh, një domosdoshmëri strategjike për forcimin e stabilitetit rajonal, parandalimin e konflikteve dhe shmangien e rrezikut të hapjes së fronteve të reja të pasigurisë në Europë. Sepse siguria euroatlantike është e pandashme. Dhe një NATO më e fortë në Ballkan do të thotë një Europë më e sigurt”.

Pjesëmarrja e Shqipërisë në këtë forum riafirmon angazhimin për të qenë një aleate aktive dhe kontribuuese në diskutimet strategjike të NATO-s si dhe për të zgjeruar bashkëpunimin me partnerët në funksion të sigurisë dhe mbrojtjes kolektive.