Trump propozon Tim Cook për të pasuar Jensen Huang si CEO i Nvidia
Presidenti i Shteteve të Bashkuara, Donald Trump, ka propozuar Tim Cook, ish-drejtorin ekzekutiv të Apple, si pasardhës të Jensen Huang në krye të kompanisë Nvidia.
Në një reagim të publikuar në rrjetet sociale, Trump deklaroi se Cook është i vetmi person që mund të marrë drejtimin e gjigantit teknologjik pas largimit të Huang.
“ Tani që drejtori ekzekutiv i Nvidia, Jensen Huang, i cili ka bërë një punë fantastike, ka dhënë dorëheqjen, ekziston vetëm një person që mund ta zëvendësojë: Tim Cook i Apple”, shkroi Trump.
“Një legjendë zëvendëson një legjendë!”, shtoi presidenti amerikan.
Nvidia konfirmon largimin e Jensen Huang pas 33 vitesh
Më herët gjatë së enjtes, Nvidia njoftoi largimin e Jensen Huang nga pozicionet e presidentit, drejtorit ekzekutiv dhe anëtarit të bordit drejtues, duke shënuar kështu fundin e një periudhe 33-vjeçare në drejtimin e kompanisë, të cilën ai e bashkëthemeloi.
Sipas njoftimit të bordit drejtues, detyrën e drejtores së përkohshme ekzekutive do ta marrë Colette Kress, e cila aktualisht mban pozicionin e zëvendëspresidentes ekzekutive dhe drejtoreshës financiare të Nvidia.
Kress do të vijojë njëkohësisht edhe detyrën e saj si drejtoreshë financiare, deri në emërimin e pasardhësit të përhershëm të Huang.
Ndërkohë, bordi drejtues ka nisur procesin e kërkimit për një drejtues të ri, duke shqyrtuar kandidatë si nga brenda kompanisë, ashtu edhe jashtë saj.
Vetëm të dielën, bordi i Nvidia kishte shprehur besimin e tij te Huang dhe ekipi drejtues i kompanisë. Megjithatë, sipas statutit të saj, drejtori ekzekutiv mund të shkarkohet “me ose pa arsye”, nëse një vendim i tillë miratohet nga shumica e anëtarëve të bordit.
Një boshllëk i madh në drejtimin e gjigantit të inteligjencës artificiale
Largimi i Jensen Huang krijon një boshllëk të konsiderueshëm në drejtimin e Nvidia, një prej kompanive më të fuqishme në industrinë globale të teknologjisë dhe inteligjencës artificiale.
Kompania, me një vlerë të tregut prej rreth 4 trilionë dollarësh, është ndërtuar dhe zhvilluar nën drejtimin e Huang për më shumë se tri dekada.
Propozimi i Trump për Tim Cook vjen në një moment të rëndësishëm për të ardhmen e Nvidia, ndërsa kompania pritet të vendosë për drejtuesin që do të marrë përsipër drejtimin e saj në një nga periudhat më vendimtare për industrinë e teknologjisë.
