Një kontrast interesant këtë mbrwmje në zemër të Tiranës, ku bulevardi “Dëshmorët e Kombit” është bërë vendtakimi i dy atmosferave krejt të ndryshme.

Nga njëra anë, para godinës së Kryeministrisë, një grusht njerëzish janë mbledhur për protestën e radhës, ndërsa nga ana tjetër, në të njëjtin bulevard, shumë tifozë kuqezi po ecin drejt stadiumit “Air Albania”, ku do të luhet ndeshja Shqipëri-Finlandë.

Ndërsa një grup qytetarësh ka zgjedhur të kalojë pasditen duke kwrkuar dorwheqjen e kryeministrit Rama shumë të tjerë janë nisur për të mbështetur Kombëtaren shqiptare.

Kështu, në të njëjtin bulevard, vetëm pak metra larg njëri-tjetrit, takohen dy realitete të ndryshme të kryeqytetit: protesta para Kryeministrisë dhe atmosfera e futbollit që shoqëron tifozët në rrugën drejt stadiumit.

Një pamje e veçantë e një pasditeje në Tiranë, ku politika dhe futbolli ndajnë për disa orë të njëjtin bulevard, por jo të njëjtën atmosferë.

Rendit zhvillimet sipas orarit:
Ora 19:20
Atmosferë festive me daulle para ndeshjes Shqipëri-Finlandë, mbi 21 mijë tifozë kuqezi mbushin stadiumin! Kërcejnë e këndojnë në mbështetje të Kombëtares

Prej orës 18:30 ka nisur hyrja e tifozëve në stadium, në prag të sfidës Shqipëri-Finlandë. Që në minutat e para është vënë re një fluks i lartë mbështetësish, të cilët i janë drejtuar shkallëve të stadiumit për të ndjekur nga afër Kombëtaren shqiptare. Atmosfera jashtë stadiumit është shoqëruar me entuziazëm me muzikë dhe ritme daullesh.

Në mesin e tifozëve shihet një djalë i vogël me kostum tradicional popullor shqiptar, i cili me daulle i është bashkuar grupit të instrumentistëve që po ndezin atmosferën kuqezi jashtë stadiumit

Interesi për këtë përballje ka qenë i lartë, pasi të gjitha biletat janë shitur prej dy ditësh ku mbi 21 mijë tifozë pritet të jenë të pranishëm në stadium, për të mbështetur Kombëtaren.

A.C/Shqiptarja.com